جوس بٹلر اور ہیری بروک کی دھواں دار بیٹنگ کی بدولت انگلینڈ نے پانچویں اور آخری ٹی 20 میں بھارت کو 56 رنز سے شکست دے کر پانچ میچوں کی سیریز 0-4 سے اپنے نام کر لی۔
ساؤتھمپٹن میں کھیلے گئے میچ میں بھارتی کپتان شریاس ایئر نے ٹاس جیت کر پہلے فیلڈنگ کا فیصلہ کیا، تاہم یہ فیصلہ ان کے حق میں ثابت نہ ہو سکا۔ انگلینڈ نے مقررہ 20 اوورز میں 3 وکٹوں کے نقصان پر 257 رنز کا پہاڑ جیسا مجموعہ اسکور بورڈ پر سجا دیا۔
انگلینڈ کی جانب سے ابتدا ہی سے جارحانہ بیٹنگ کا مظاہرہ کیا گیا۔ جوس بٹلر اور ہیری بروک نے دوسرے وکٹ کی شاندار شراکت میں صرف 103 گیندوں پر 233 رنز جوڑ کر بھارتی بولنگ اٹیک کو بے بس کر دیا، جو ٹی ٹوئنٹی کرکٹ کی یادگار شراکتوں میں شمار کی جائے گی۔
جوس بٹلر نے صرف 51 گیندوں پر اپنی سنچری مکمل کی اور 64 گیندوں پر 131 رنز کی برق رفتار اننگز کھیل کر آؤٹ ہوئے، جس میں متعدد چوکے اور چھکے شامل تھے۔ دوسری جانب ہیری بروک نے بھی جارحانہ انداز اپناتے ہوئے صرف 19 گیندوں پر نصف سنچری مکمل کی اور 35 گیندوں پر ناقابلِ شکست 95 رنز بنا کر ٹیم کے مجموعے کو 257 تک پہنچانے میں اہم کردار ادا کیا۔
258 رنز کے ہدف کے تعاقب میں بھارتی ٹیم آغاز ہی سے مطلوبہ رن ریٹ کے دباؤ میں رہی۔ ایشان کشن نے 56 جبکہ تلک ورما نے 53 رنز کی مزاحمتی اننگز کھیلیں، تاہم دیگر بیٹرز خاطر خواہ کارکردگی نہ دکھا سکے اور پوری ٹیم مقررہ 20 اوورز میں 8 وکٹوں کے نقصان پر 201 رنز ہی بنا سکی۔
انگلینڈ کی جانب سے سیم کرن نے عمدہ بولنگ کا مظاہرہ کرتے ہوئے 36 رنز دے کر 3 اہم وکٹیں حاصل کیں اور اپنی ٹیم کی فتح میں نمایاں کردار ادا کیا۔
واضح رہے کہ پانچ میچوں کی سیریز کا پہلا مقابلہ بارش کے باعث بے نتیجہ ختم ہوا تھا، جبکہ باقی چاروں میچز میں انگلینڈ نے بھارت کو شکست دے کر 0-4 سے سیریز پر قبضہ جما لیا۔
اس شاندار کامیابی کے ساتھ انگلینڈ نے آئی سی سی ٹی ٹوئنٹی ٹیم رینکنگ میں بھی بھارت کو پیچھے چھوڑتے ہوئے پہلی پوزیشن حاصل کر لی۔