ملک بھر میں کم بجلی استعمال کرنے والے صارفین کیلئے حکومتی سبسڈی کے نظام کو مزید شفاف اور مؤثر بنانے کے لیے نئی سہولت متعارف کرانے کی تیاریاں کی جا رہی ہیں، اس اقدام کا مقصد بجلی کے شعبے میں سبسڈی کی تقسیم کو بہتر بنانا اور اس بات کو یقینی بنانا ہے کہ فائدہ اصل مستحق افراد تک ہی پہنچے۔
نجی ٹی وی رپورٹس کے مطابق200یونٹ سے کم بجلی استعمال کرنے والے صارفین پہلے ہی حکومتی سبسڈی سے فائدہ اٹھا رہے ہیں، تاہم اب اس نظام میں مزید شفافیت لانے کیلئے ایک نیا تصدیقی طریقہ کار متعارف کروایا جا رہا ہے، اس نئے نظام کے تحت صارفین کو اپنی سبسڈی کی تفصیلات تک براہِ راست رسائی حاصل ہو سکے گی۔
اطلاعات کے مطابق بجلی کے بلوں پر موجود کیو آر کوڈ کو اسکین کرنے کے بعد صارفین اپنے سبسڈی ڈیٹا کو دیکھ سکیں گے، اس عمل کے دوران صارفین کی شناخت کی تصدیق کے لیے ایک بار استعمال ہونے والا پاس کوڈ بھی فراہم کیا جائے گا، جس کے بعد مکمل تفصیلات تک رسائی ممکن ہو گی، اس نظام کا مقصد ڈیجیٹل شفافیت کو فروغ دینا اور غلط معلومات یا غیر ضروری پیچیدگیوں کو ختم کرنا بتایا جا رہا ہے۔
ذرائع کے مطابق مستقبل میں یہ امکان بھی زیر غور ہے کہ بجلی سبسڈی کا دائرہ مزید محدود کیا جائے اور اسے صرف مخصوص مستحق طبقات تک رکھا جائے، ان میں سماجی تحفظ کے پروگراموں سے وابستہ خاندان، جیسے کہ بے نظیر انکم سپورٹ پروگرام کے مستحقین، شامل ہو سکتے ہیں۔
مجوزہ منصوبے کے تحت اہل صارفین کو سبسڈی پہلے ہی بل میں شامل کر کے جاری کیا جائے گا، جبکہ غیر اہل صارفین کو مکمل بل ادا کرنا ہوگا، اس طریقہ کار سے سبسڈی کے نظام میں موجود بے ضابطگیوں کو کم کرنے میں مدد ملنے کی توقع ظاہر کی جا رہی ہے۔
مزید بتایا گیا ہے کہ نئے نظام کے تحت صارفین یہ بھی دیکھ سکیں گے کہ ان کے بل میں کتنی رعایت شامل کی گئی ہے اور یہ رعایت کس معیار کی بنیاد پر دی گئی ہے، اس سے عوام میں اعتماد بڑھانے اور نظام کو زیادہ قابلِ فہم بنانے میں مدد ملے گی۔
اس مجوزہ اقدام کا بنیادی مقصد سبسڈی کے نظام کو زیادہ مؤثر، شفاف اور ہدف شدہ بنانا ہے، تاکہ حکومتی وسائل کا درست استعمال یقینی بنایا جا سکے۔
