برطانیہ کی آٹو مارکیٹ میں چینی کار ساز کمپنیوں کی تیزی سے بڑھتی ہوئی مقبولیت نے قیمتوں اور ڈیلز کے میدان میں بڑی تبدیلی پیدا کر دی ہے، جس کے باعث خریدار اب معروف اور پرانی گاڑیوں پر بھی نمایاں رعایت حاصل کر رہے ہیں۔
رپورٹس کے مطابق BYD، Chery اور Omoda جیسے چینی برانڈز کی مارکیٹ میں مضبوط انٹری نے روایتی آٹو کمپنیوں کو سخت مقابلے پر مجبور کر دیا ہے۔
اس بڑھتے ہوئے مقابلے کے نتیجے میں خریدار اب Peugeot 3008، Toyota C-HR، Hyundai Tucson، Volkswagen Tiguan اور دیگر مشہور SUVs پر بھی بڑی رعایت حاصل کر رہے ہیں۔
ماہرین کے مطابق بعض گاڑیوں پر اوسطاً 10 فیصد سے زائد رعایت دی جا رہی ہے، جبکہ کچھ ماڈلز پر خریدار ہزاروں پاؤنڈز تک کی بچت کر سکتے ہیں۔ اس صورتحال نے مارکیٹ میں “Temu Range Rover” کے نام سے مشہور Jaecoo 7 کے مقابلے کو مزید دلچسپ بنا دیا ہے۔
رپورٹ میں بتایا گیا ہے کہ Nissan Qashqai، Skoda Karoq اور Renault Symbioz جیسے ماڈلز پر مناسب مذاکرات کے ذریعے مزید قیمت کم کروائی جا سکتی ہے۔
کار ماہرین کا کہنا ہے کہ اکثر خریدار ڈیلرشپ پر مناسب انداز میں مذاکرات نہیں کرتے، جس کی وجہ سے وہ اوسطاً ایک ہزار پاؤنڈ سے زائد اضافی ادائیگی کر دیتے ہیں۔ تاہم تحقیق سے ثابت ہوا ہے کہ درست حکمت عملی کے ساتھ نمایاں رعایت حاصل کرنا ممکن ہے۔
ماہرین کے مطابق SUV مارکیٹ میں اس سخت مقابلے نے نہ صرف قیمتوں کو متوازن کیا ہے بلکہ خریداروں کے لیے بہتر ڈیلز اور زیادہ آپشنز بھی پیدا کر دیے ہیں۔