ایران کے نئے سپریم لیڈر مجتبیٰ خامنہ ای کے زخمی ہونے کی اطلاعات نے بین الاقوامی سطح پر ہلچل پیدا کر دی ہے۔ ایران کے سرکاری ٹی وی نے انہیں ’رمضان کی جنگ کا زخمی فوجی‘ قرار دیا، تاہم چوٹ کی نوعیت اور شدت کے حوالے سے تفصیلات فراہم نہیں کی گئیں۔
غیر ملکی خبر رساں اداروں کے مطابق ایرانی صدر کے بیٹے یوسف پزشکیان نے اپنے ٹیلی گرام پیغام میں بتایا کہ انہیں اطلاع ملی تھی کہ سپریم لیڈر زخمی ہو گئے ہیں، لیکن انہوں نے فوری طور پر متعلقہ حلقوں سے تصدیق کی۔ ان کے مطابق، الحمدللہ، مجتبیٰ خامنہ ای محفوظ اور خیریت سے ہیں۔
ادھر امریکی اخبار نیویارک ٹائمز نے تین ایرانی حکام کے حوالے سے رپورٹ دی کہ مجتبیٰ خامنہ ای کو زخمی ہونے کی اطلاعات ملی ہیں۔ رپورٹ میں کہا گیا کہ ان کی ٹانگوں پر زخم آئے ہیں، لیکن وہ ہوش میں ہیں اور ایک انتہائی محفوظ مقام پر موجود ہیں۔
یہ خبر ایران میں سیاسی اور عسکری حلقوں میں تشویش کا باعث بنی ہوئی ہے، اور سپریم لیڈر کی سلامتی پر ہر لمحے کی اطلاعات بین الاقوامی توجہ حاصل کر رہی ہیں۔