پالی کیلے : ٹی ٹوئنٹی ورلڈ کپ کے آج کے شیڈول میں تین میچز شامل ہیں۔ پہلے میچ میں عمان نے سری لنکا کے خلاف ٹاس جیت کر پہلے فیلڈنگ کا فیصلہ کیا ہے۔
عمان کے کپتان جتیندر سنگھ کا کہنا تھا کہ صبح کی ہلکی نمی کا فائدہ اٹھاتے ہوئے پہلے بولنگ کا فیصلہ کیا گیا ہے۔ انہوں نے کہا کہ ٹیسٹ کھیلنے والے ممالک کے خلاف کھیلنے کے مواقع کم ملتے ہیں، اس لیے یہ ایک بہترین موقع ہے۔ عمان کی ٹیم میں دو تبدیلیاں کی گئی ہیں، جے اوڈیدرا اور محمد ندیم کو حتمی الیون میں شامل کیا گیا ہے۔
دوسری جانب سری لنکا کے کپتان داسن شناکا نے کہا کہ وہ پہلے بیٹنگ کرتے ہوئے مطمئن ہیں۔ تاہم ٹیم کے اہم اسپنر وانندو ہسرنگا آج کا میچ نہیں کھیل رہے اور ان کی جگہ ہیمنتھا کو ٹیم میں شامل کیا گیا ہے۔
آج کے دیگر میچز میں اٹلی اور نیپال کی ٹیمیں دوپہر ڈھائی بجے مدمقابل ہوں گی، جبکہ تیسرے میچ میں نمیبیا کا مقابلہ بھارت سے ہوگا۔ کرکٹ شائقین کو آج سنسنی خیز مقابلوں کی توقع ہے۔