لاہور: انٹرنیشنل کرکٹ کونسل (آئی سی سی) پاک بھارت میچ کے بائیکاٹ پر پی سی بی کے سامنے جھک گئی ہے اور اسے قائل کرنے کے لیے بے چین ہے۔
ذرائع کے مطابق پاک بھارت میچ پر تنازع کے حل کے لیے آئی سی سی کا اعلیٰ سطح کا وفد آئندہ چند گھنٹوں میں لاہور پہنچ رہا ہے۔
وفد کی قیادت آئی سی سی کے ڈپٹی چیئرمین کریں گے۔ لاہور پہنچنے کے بعد دونوں ممالک کے کرکٹ بورڈز کے درمیان معاملات پر بات چیت کے لیے ہنگامی اجلاس ہوگا۔ اس ملاقات کا مقصد دونوں فریقوں کے درمیان سمجھوتہ کرانا اور میچ کی صورتحال کو خوش اسلوبی سے حل کرنا ہے۔
ذرائع کے مطابق اس موقع پر بنگلہ دیش کرکٹ بورڈ کے صدر امین الاسلام بھی لاہور پہنچ گئے ہیں۔ آئی سی سی وفد اور بی سی بی صدر کے درمیان ملاقات کے بعد وفد آج روانہ ہو جائے گا۔
اس اقدام سے ظاہر ہوتا ہے کہ آئی سی سی پی سی بی اور بنگلہ دیش بورڈ دونوں کو راضی کرنے کی پوری کوشش کر رہا ہے۔
واضح رہے کہ پاک بھارت میچ پر تنازع بین الاقوامی کرکٹ برادری کے لیے ایک حساس مسئلہ رہا ہے اور آئی سی سی کی جانب سے یہ ہنگامی مداخلت پاکستان اور بھارت کے درمیان کرکٹ تعلقات کو بہتر بنانے اور آئندہ ٹورنامنٹس کے شیڈول میں حائل رکاوٹوں کو دور کرنے کی کوشش ہے۔
شائقین کرکٹ کی نظریں اب لاہور میٹنگ کے نتائج پر مرکوز ہیں، جو پاک بھارت میچ اور خطے میں کرکٹ سیاست کے مستقبل کا تعین کرے گا۔