وفاقی مشیر برائے داخلہ اور سابق وزیراعلیٰ خیبر پختونخوا پرویز خٹک کی زخمی حالت میں پہلی تصویر منظرعام پر آ گئی ہے، جو پختون ڈیجیٹل کو موصول ہوئی ہے۔ تصویر سامنے آنے کے بعد ان کی صحت سے متعلق تفصیلات بھی سامنے آ گئی ہیں۔
ذرائع کے مطابق پرویز خٹک گزشتہ ہفتے اسلام آباد میں پیش آنے والے ایک ٹریفک حادثے میں زخمی ہو گئے تھے، جس کے فوراً بعد انہیں ابتدائی طبی امداد فراہم کرتے ہوئے اسلام آباد کے پی اے ایف ہسپتال منتقل کیا گیا، جہاں اس وقت بھی ان کا علاج جاری ہے۔
طبی ذرائع کا کہنا ہے کہ حادثے کے نتیجے میں پرویز خٹک کے دونوں ہاتھوں میں فریکچر آیا ہے۔ منظر عام پر آنے والی تصویر میں دیکھا جا سکتا ہے کہ وہ ہسپتال کے بستر پر زیرِ علاج ہیں اور طبی عملہ ان کی دیکھ بھال میں مصروف ہے۔
ڈاکٹروں کے مطابق پرویز خٹک کی حالت خطرے سے باہر ہے، تاہم انہیں مکمل صحت یابی کے لیے مزید آرام اور مسلسل علاج کی ضرورت ہے۔ طبی ماہرین نے انہیں چند ہفتے مکمل آرام کا مشورہ دیا ہے۔
قریبی ذرائع کے مطابق پرویز خٹک کی طبیعت میں بتدریج بہتری آ رہی ہے اور وہ ڈاکٹروں کی ہدایات پر عمل کر رہے ہیں۔ ان کے اہلِ خانہ اور قریبی سیاسی ساتھی بھی ہسپتال میں ان کی خیریت دریافت کرتے رہے ہیں۔
واضح رہے کہ پرویز خٹک ملکی سیاست کی ایک اہم شخصیت ہیں اور ان کی صحت سے متعلق خبریں سامنے آنے کے بعد عوام اور سیاسی حلقوں میں تشویش پائی جا رہی تھی، جس پر اب ان کی حالت مستحکم ہونے کی تصدیق نے اطمینان پیدا کیا ہے۔