فلور ملز نے خیبر پختونخوا کے وزیراعلیٰ سہیل آفریدی کے فارمولا کو عوام کو دھوکا دینے کے مترادف قرار دیتے ہوئے مسترد کر دیا۔
پشاور سے میڈیا رپورٹس میں بتایا جا رہا ہے کہ فلور ملز مالکان نے خیبرپختونخوا حکومت کےآٹا فارمولا کو عوام کو دھوکا دینے کے برابر قرار دیا ہے اور اس فارمولا کومسترد کردیا ہے۔
فلور ملز اونرز نے کہا ہے کہ یہ فارمولا قابل عمل نہیں ہے۔ اس سے فلور مل انڈسٹری بند ہوجائے گی، ہم عوام کو دھوکا نہیں دینا چاہتے۔
فلور ملز ایسوسی ایشن کے صدر نعیم بٹ نے پریس کانفرنس کرتے ہوئے کہا کہ آج گندم کا نرخ 13 ہزار 5سو روپے فی من ہے۔ 3 ہزار روپے 20 کلو تھیلے کا نرخ ہوگیا ہے۔ پنجاب سے آٹے کی سپلائی بحال نہ ہوئی تو رمضان کے مہینے میں مزید آٹا مہنگا ہونے کا امکان ہے۔ فلور ملز انڈسٹری نقصان کا شکار ہے، حکومت نے جو 15 سو ٹن گندم دینے کا فیصلہ کیا ہے وہ انتہائی قلیل ہے۔
نعیم بٹ نے کہا کہ خیبرپختونخوا حکومت نے گندم کا اپنا جو نرخ دیا ہے وہ ناقابل قبول ہے، خیبرپختونخوا حکومت نے گندم کا جو فارمولا دیا ہے اس سے فلور مل انڈسٹری بند ہوجائے گی۔ ہم عوام کو دھوکا نہیں دینا چاہتے۔ یہ فارمولا قابل عمل نہیں۔