سونے کی قیمت میں بڑی کمی، عالمی منڈی میں بھی بریک، جانئے فی تولہ سونا کتنے کا ہو گیا؟ خریداروں کیلئے اہم خبرآگئی ۔
تفصیلات کے مطابق مقامی صرافہ مارکیٹ میں سونے کی قیمت میں آج نمایاں کمی دیکھنے میں آئی ہے، جس سے سرمایہ کاروں اور صارفین دونوں کی دلچسپی بڑھ گئی ہے۔ آل پاکستان صرافہ ایسوسی ایشن کے مطابق فی تولہ 24 کیرٹ سونے کی قیمت میں 3,700 روپے کی کمی ہوئی ہے اور یہ 482,462 روپے پر آگیا۔ اسی طرح دس گرام سونے کی قیمت میں 3,172 روپے کی کمی ریکارڈ کی گئی، جس کے بعد یہ 413,633 روپے پر پہنچ گیا۔
چاندی کی قیمت میں بھی کمی دیکھنے میں آئی ہے، فی تولہ چاندی 150 روپے کم ہو کر 9,425 روپے پر آگئی۔
عالمی منڈی میں سونے کی قیمت میں بھی نمایاں تبدیلی آئی ہے۔ فی اونس سونا 37 ڈالر سستا ہو کر 4,601 ڈالر کی سطح پر پہنچ گیا، جس کی بنیادی وجہ ایران پر حملے کے امکانات میں کمی اور عالمی سیاسی کشیدگی میں سکون قرار دیا جا رہا ہے۔
ماہرین کا کہنا ہے کہ پاکستان میں سونے اور چاندی کی قیمتیں گزشتہ چند دنوں میں مسلسل بڑھ رہی تھیں اور تاریخی بلند ترین سطح پر پہنچ گئی تھیں، مگر حالیہ کمی نے مارکیٹ میں بریک لگا دیا ہے۔ سرمایہ کاروں اور صارفین کے لیے یہ موقع سونے میں خریداری کے لیے فائدہ مند ہو سکتا ہے۔
صرافہ مارکیٹ میں موجود تاجروں کا کہنا ہے کہ قیمتوں میں اتار چڑھاؤ عالمی منڈی کے اثرات اور ملکی حالات سے متاثر ہوتا ہے، اور آئندہ چند دنوں میں یہ اتار چڑھاؤ جاری رہنے کا امکان ہے۔