چیئرمین پاکستان تحریک انصاف بیرسٹر گوہر نے کہا ہے کہ قومی اسمبلی میں اپوزیشن لیڈر کے تقرر سے متعلق تمام معاملات طے پا چکے ہیں اور جمعرات تک محمود اچکزئی کا بطور اپوزیشن لیڈر نوٹیفکیشن جاری کر دیا جائے گا۔
میڈیا سے گفتگو کرتے ہوئے بیرسٹر گوہر نے بتایا کہ پی ٹی آئی کے وفد نے اسپیکر قومی اسمبلی سے ملاقات کی، جس کے دوران اپوزیشن لیڈر کے تقرر کے طریقہ کار پر تفصیلی مشاورت ہوئی۔ ان کے مطابق اسپیکر کے ساتھ قانونی اور آئینی تقاضوں کو مدنظر رکھتے ہوئے فیصلہ کیا گیا ہے اور اب نوٹیفکیشن کے اجرا میں کوئی رکاوٹ باقی نہیں رہی۔
بیرسٹر گوہر نے انکشاف کیا کہ اسپیکر سے ہونے والی ملاقات میں پاکستان پیپلز پارٹی کے دو ارکان بھی موجود تھے، تاہم انہوں نے واضح کیا کہ چونکہ پیپلز پارٹی اپوزیشن بینچز پر نہیں بیٹھی، اس لیے اسے اپوزیشن لیڈر کے تقرر کے معاملے میں کوئی آئینی یا اخلاقی حق حاصل نہیں ہے۔
انہوں نے مزید کہا کہ پیپلز پارٹی کے نمائندوں نے خود اس بات کا اعتراف کیا ہے کہ وہ اس حوالے سے کوئی دستاویز جمع نہیں کرائیں گے۔ بیرسٹر گوہر کے مطابق اپوزیشن کی اکثریتی جماعت کی جانب سے محمود اچکزئی کے نام پر اتفاق ہو چکا ہے اور تمام قانونی تقاضے پورے کیے جا رہے ہیں۔
سیاسی مبصرین کا کہنا ہے کہ محمود اچکزئی کا بطور اپوزیشن لیڈر تقرر ایوان کے اندر اپوزیشن کے کردار کو مزید متحرک کر سکتا ہے، جبکہ یہ فیصلہ اپوزیشن صفوں میں جاری سیاسی سسپنس کے خاتمے کی جانب بھی ایک اہم قدم سمجھا جا رہا ہے۔
واضح رہے کہ گزشتہ کچھ عرصے سے اپوزیشن لیڈر کے عہدے پر تقرری کے حوالے سے مختلف آرا سامنے آ رہی تھیں، تاہم بیرسٹر گوہر کے تازہ بیان کے بعد یہ معاملہ اپنے منطقی انجام کے قریب دکھائی دیتا ہے۔