میئر کراچی مرتضیٰ وہاب کا سنسنی خیز ردعمل سامنے آگیا ،پی ٹی آئی کے جلسے کے لیے اگر مدد چاہیے ہوتی تو ہم فراہم کر دیتے۔
تفصیلات کے مطابق میئر کراچی مرتضیٰ وہاب نے پی ٹی آئی کے حالیہ جلسے پر ردعمل دیتے ہوئے کہا ہے کہ باغ جناح بڑا گراؤنڈ ہے اور اسے بھرنا آسان کام نہیں۔ انہوں نے کہا کہ اگر پی ٹی آئی کے پاس گراؤنڈ بھرنے کے لیے مناسب لوگ نہیں تھے تو وہ ہمیں بتاتے، ہم مدد دینے کے لیے تیار تھے۔
میئر کراچی کے مطابق جلسے کے حوالے سے سیاسی ماحول میں تناؤ بڑھانے کی کوششیں کی جا رہی ہیں، تاہم پُرامن ماحول قائم رکھنا ہر شہری کا حق ہے۔ انہوں نے کہا کہ سیاسی جماعتیں اور حکومتیں عوامی مفاد میں کام کریں تاکہ جلسے اور احتجاج دونوں پرامن طریقے سے ہوں۔
دوسری جانب وزیر مملکت بلال اظہر کیانی نے بھی پی ٹی آئی کے جلسے پر تبصرہ کرتے ہوئے کہا کہ پُرامن احتجاج اور پی ٹی آئی کے سیاسی رویے دو الگ چیزیں ہیں۔ ان کا کہنا تھا کہ وزیراعلیٰ خیبرپختونخوا سہیل آفریدی دیگر صوبوں میں جا کر جلسے کرنے کے بجائے اپنے صوبے میں کام کریں تاکہ عوامی مسائل حل کیے جا سکیں۔
واضح رہے کہ گزشتہ روز وزیر اعلیٰ خیبرپختونخوا سہیل آفریدی نے کراچی میں جلسہ کیا۔ نمائش چورنگی پر خطاب کرتے ہوئے انہوں نے کہا کہ مختلف مقامات پر پولیس نے کارروائیاں کیں، تاہم اس کے باوجود بڑی تعداد میں لوگ جلسے میں شریک ہوئے۔ انہوں نے کہا کہ پنجاب اور سندھ میں حکومتوں نے ان کے ساتھ اچھا سلوک نہیں کیا، جس کے بعد وہ خیبرپختونخوا میں اگلا پڑاؤ ڈالیں گے اور اسٹریٹ موومنٹ کے ذریعے بانی پی ٹی آئی کا پیغام ملک بھر میں پہنچائیں گے۔
سیاسی مبصرین کے مطابق، میئر کراچی کا یہ طنزیہ ردعمل جلسے کے دوران پیدا ہونے والے سیاسی کشمکش کی عکاسی کرتا ہے، جبکہ عوامی سطح پر پُرامن احتجاج اور سیاسی جلسوں کے درمیان فرق واضح کرنے کی ضرورت بھی محسوس کی جا رہی ہے۔