شہر نیویارک کے پہلے مسلمان میئرظہران ممدانی نے اپنے عہدے کا حلف قرآن پاک پر اٹھا لیا ہے۔ غیر ملکی میڈیا کے مطابق، حلف برداری کی تقریب سٹی ہال، نیویارک میں منعقد ہوئی، جہاں اٹارنی جنرل نیویارک لیٹیا جیم نے ظہران ممدانی سے عہدے کا حلف لیا۔ اس موقع پر ظہران ممدانی کی اہلیہ بھی موجود تھیں۔
ظہران ممدانی، جو ڈیموکریٹک پارٹی سے تعلق رکھتے ہیں، 4 نومبر 2025 کو ہونے والے میئر کے الیکشن میں 50.78 فیصد ووٹ حاصل کر کے کامیاب ہوئے اور وہ نیویارک کے 112 ویں میئر منتخب ہوئے۔ یہ کامیابی ان کے لیے ایک تاریخی لمحہ ہے، کیونکہ وہ شہر کے پہلے مسلمان میئر ہیں۔
الیکشن سے قبل سابق صدر ڈونلڈ ٹرمپ نے انہیں نسلی تعصب کا نشانہ بنایا تھا، تاہم میئر کے عہدے پر منتخب ہونے کے بعد ٹرمپ نے نہ صرف ظہران ممدانی کو مبارکباد دی بلکہ نیویارک کی بہتری کے لیے مل کر کام کرنے کا بھی یقین دلایا۔
ظہران ممدانی کی کامیابی کو دنیا بھر میں ایک اہم سیاسی سنگِ میل کے طور پر دیکھا جا رہا ہے، کیونکہ یہ امریکا میں مسلم رہنماؤں کی نمائندگی اور اقلیتی حقوق کی فتح کی علامت ہے۔