پنجاب کی وزیر اطلاعات عظمیٰ بخاری نے کہا ہے کہ خیبرپختونخوا کے وزرا کی بدزبانی پر افسوس ہے، ان کےبرے رویے کو تحمل سے برداشت کیا۔
تفصیلات کے مطابق پنجاب کی وزیر اطلاعات عظمیٰ بخاری نے خیبرپختونخوا کے وزرا کی جانب سے کی جانے والی بدزبانی اور نامناسب طرزِ عمل پر شدید افسوس کا اظہار کرتے ہوئے کہا ہے کہ پنجاب حکومت نے ہمیشہ سیاسی اختلاف کے باوجود برداشت اور تحمل کا مظاہرہ کیا ہے۔
لاہور میں پریس کانفرنس سے خطاب کرتے ہوئے عظمیٰ بخاری کا کہنا تھا کہ خیبرپختونخوا کے وزرا کی جانب سے استعمال کی گئی زبان اور رویہ نہ صرف افسوسناک ہے بلکہ ان کی سیاسی تربیت کی بھی عکاسی کرتا ہے۔ انہوں نے کہا کہ ہم نے ان کے برے رویوں کو تحمل کے ساتھ برداشت کیا، کیونکہ پنجاب حکومت سیاسی شائستگی پر یقین رکھتی ہے۔
وزیر اطلاعات پنجاب نے کہا کہ خیبرپختونخوا کے وزیراعلیٰ پنجاب کے مہمان ہیں، تاہم پنجاب اسمبلی میں پیش آنے والی ہنگامہ آرائی کے دوران ان کے وزرا کے الفاظ کے انتخاب اور طرزِ عمل پر صرف افسوس ہی کیا جا سکتا ہے۔ ان کا کہنا تھا کہ وزرا کو چاہیے کہ وہ اپنی زبان اور لب و لہجے پر قابو رکھیں، کیونکہ گفتگو انسان کی سوچ اور تربیت کو ظاہر کرتی ہے۔
عظمیٰ بخاری نے وزیراعلیٰ پنجاب مریم نواز شریف کی کارکردگی کا ذکر کرتے ہوئے کہا کہ وزیراعلیٰ مریم نواز مخالفین کی بے جا تنقید کی پرواہ کیے بغیر صوبے کے عوام کی فلاح و بہبود کے لیے دن رات محنت کر رہی ہیں۔ انہوں نے کہا کہ تعلیم، صحت، امن و امان اور عوامی سہولیات سمیت ہر شعبے میں نمایاں اور انقلابی اقدامات کیے گئے ہیں۔
انہوں نے بتایا کہ پنجاب میں امن و امان کی صورتحال تسلی بخش ہے، جس کے لیے جدید سیکیورٹی اقدامات کیے گئے ہیں۔ سیکیورٹی کے شعبے میں ڈرونز کی خریداری اور ڈیجیٹل سسٹمز کی تنصیب عمل میں لائی گئی ہے تاکہ جرائم کی مؤثر نگرانی ممکن ہو سکے۔
عظمیٰ بخاری کے مطابق ستھرا پنجاب پروگرام کے تحت صوبے بھر میں صفائی کے نظام کو جدید خطوط پر استوار کیا گیا ہے، جسے عالمی سطح پر بھی سراہا گیا ہے۔ اسی طرح “اپنا گھر، اپنی چھت” پروگرام کے تحت اب تک 50 ہزار گھروں کی تعمیر مکمل ہو چکی ہے جبکہ 75 ہزار گھر زیرِ تعمیر ہیں۔
وزیر اطلاعات نے مزید بتایا کہ گزشتہ 13 ماہ کے دوران کسان کارڈ کے ذریعے کسانوں کو 250 ارب روپے کی مالی معاونت فراہم کی گئی ہے، جبکہ طلبہ کی سہولت کے لیے الیکٹرک بائیکس تقسیم کی جا رہی ہیں تاکہ انہیں آمد و رفت میں آسانی ہو۔
آخر میں عظمیٰ بخاری نے کہا کہ وزیراعلیٰ مریم نواز شریف کی قیادت میں شروع کیے گئے ترقیاتی اور فلاحی منصوبوں کے عوام پر دور رس مثبت اثرات مرتب ہوں گے، اور پنجاب حکومت عوامی خدمت کے مشن کو پوری ذمہ داری کے ساتھ جاری رکھے گی۔