پاکستان میں شیخ محمد بن زید کے دورے کے تمام انتظامات مکمل کر لیے گئے ، صدر پاکستان کی جانب سے متحدہ عرب امارات کے صدر کا باوقار استقبال کیا جائے گا
تفصیلات کے مطابق متحدہ عرب امارات کے صدر شیخ محمد بن زید النیہان کے پاکستان کے سرکاری دورے کی تاریخ منظر عام پر آ گئی ہے۔ ذرائع کے مطابق، شیخ محمد بن زید النیہان جمعہ کو پاکستان پہنچیں گے، جہاں ان کا شاندار استقبال کیا جائے گا اور دونوں ممالک کے درمیان دوطرفہ تعلقات اور خطے کی سلامتی پر تفصیلی مشاورت متوقع ہے۔
دورے کے دوران اقتصادی، تجارتی اور سرمایہ کاری کے شعبوں میں تعاون کو مزید مضبوط بنانے پر بات چیت ہوگی۔ علاوہ ازیں، خطے میں امن و سلامتی اور دفاعی تعلقات پر بھی تبادلہ خیال کیا جائے گا، جس سے دونوں ممالک کے تعلقات میں نئی بلندیوں کو فروغ ملنے کی توقع ہے۔
حکام کا کہنا ہے کہ یہ دورہ دوطرفہ تعلقات کو مزید فروغ دینے اور خطے میں مشترکہ مفادات کے فروغ کے لیے اہم سنگِ میل ثابت ہوگا۔ ملاقاتوں اور مذاکرات کے اختتام پر ایک مشترکہ اعلامیہ بھی جاری کیا جائے گا، جس میں دونوں ممالک کے تعلقات اور مستقبل کے منصوبوں کا تفصیلی خاکہ پیش کیا جائے گا۔