آئی جی پنجاب کی وضاحت، صوبے بھر میں غیر قانونی مقیم افغانوں کے انخلا کے لیے سکیورٹی ہائی الرٹ، ڈی پورٹ شدہ افراد کی تفصیلات جاری
تفصیلات کے مطابق پنجاب بھر سے غیر قانونی مقیم غیر ملکی باشندوں کے انخلا کا عمل تیزی سے جاری ہے۔ آئی جی پنجاب کے مطابق پنجاب پولیس نے اب تک لاہور سمیت پورے صوبے سے 31,377 غیر قانونی مقیم افراد، جن میں افغان شہری بھی شامل ہیں، ڈی پورٹ کر دیے ہیں۔ اس دوران 203 غیر قانونی مقیم افراد ہولڈنگ پوائنٹس پر موجود ہیں۔
ڈی پورٹ ہونے والوں میں 11,576 مرد، 6,679 خواتین اور 13,133 بچے شامل ہیں۔ مزید تفصیلات کے مطابق، ڈی پورٹ ہونے والے افراد میں 10,043 کے پاس رہائشی ثبوت موجود ہیں، 11,067 کے پاس افغان سٹیزن کارڈ ہے اور 10,267 افراد غیر قانونی مقیم قرار دیے گئے ہیں۔
آئی جی پنجاب نے بتایا کہ لاہور میں 5 جبکہ صوبے بھر میں 46 ہولڈنگ سنٹرز قائم ہیں۔ تمام سنٹرز پر سکیورٹی ہائی الرٹ ہے اور غیر قانونی مقیم افراد کے انخلا کو یقینی بنایا جا رہا ہے۔ انہوں نے مزید کہا کہ پنجاب پولیس بین الاقوامی قوانین کے تحت غیر قانونی مقیم افراد کے انخلا کی پالیسی پر عمل پیرا ہے۔
آئی جی پنجاب کا کہنا ہے کہ یہ کارروائی عوامی تحفظ اور سکیورٹی کو یقینی بنانے کے لیے جاری ہے، اور صوبائی انتظامیہ ہر غیر قانونی مقیم فرد کے حوالے سے شفاف اور قانونی طریقہ کار اختیار کر رہی ہے۔