کور کمانڈر کانفرنس نے نیوکلیئر کمانڈ اینڈ کنٹرول سسٹم سے متعلق سیکیورٹی انتظامات پر مکمل اعتماد کا اظہار کیا ہے، آرمی چیف جنرل قمرجاوید باجوہ کا کہنا ہے ایٹمی اثاثوں کے تحفظ سے متعلق بین الاقوامی قوانین کا احترام کرتے ہیں، پاکستان کا مؤثر نیوکلیئر کمانڈ اینڈ کنٹرول نظام ہے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف کی زیر صدارت جنرل ہیڈ کوارٹرز (جی ایچ کیو) میں کور کمانڈر کانفرنس کا انعقاد کیا گیا ، کانفرنس میں ملک کی اندرونی اور بیرونی سیکیورٹی صورتحال کا جائزہ لیا گیا ، کانفرنس میں سیلابی صورتحال میں آرمی کی سول انتظامیہ کے ساتھ تعاون کو سراہا گیا۔
کانفرنس کے شرکا نے نیوکلیئر کمانڈ اینڈ کنٹرول سسٹم سے متعلق سیکیورٹی انتظامات پر مکمل اعتماد کا اظہار کیا، آرمی چیف جنرل قمر جاوید باجوہ نے کہا ہے کہ پاک افواج وطن عزیز کا دفاع کرنے کے لیے ہمہ وقت تیار ہیں۔
آرمی چیف کے مطابق ایٹمی اثاثوں کی حفاظت کے لیے تمام ضروری اقدامات اٹھائے گئے ہیں، ایٹمی اثاثوں کے تحفظ سے متعلق بین الاقوامی قوانین کا احترام کرتے ہیں، ان کا کہنا تھا کہ پاکستان کا مؤثر نیوکلیئر کمانڈ اینڈ کنٹرول نظام ہے۔