پاک افغان سرحد کے قریب سکیورٹی فورسز کا آپریشن ، 7 دہشتگر د ہلاک

پاک افغان سرحد کے قریب سیکیورٹی فورسز کی کارروائی، 7 دہشت گرد مارے گئے ضلع ڑوب میں پاک افغان سرحد کے قریب سیکیورٹی فورسز کی کارروائی میں 7 دہشت گرد ہلاک ہوگئے۔آئی ایس پی آر کے مطابق 22 جنوری کو پاک افغان سرحد کے قریب ضلع ڑوب کے سمبازہ سیکٹر میں انٹیلی جنس کی بنیاد پر آپریشن کے دوران فائرنگ کا تبادلہ ہوا، جس میں سیکیورٹی فورسز نے بھرپور کارروائی کرتے ہوئے فرار ہونے والے دہشت گردوں کو گھیرے میں لے لیا۔ جس کے نتیجے میں سات دہشت گردوں کو جہنم واصل کر دیا گیا۔آئی ایس پی آر کے مطابق دہشت گرد سیکیورٹی فورسز کے خلاف دہشت گردی کے ساتھ ساتھ معصوم شہریوں کے قتل میں بھی ملوث تھے، ہلاک دہشت گردوں سے اسلحہ، گولہ بارود اور دھماکہ خیز مواد بھی برآمد ہوا ہے۔بیان میں مزید کہا گیا ہے کہ علاقے میں دیگر دہشت گردوں کے خاتمے کے لیے جہاں صفائی کی کارروائیاں کی جا رہی ہیں، پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں۔