پاکستان میں نئے سال کی تقریبات پر پابندی عائد کر دی گئی

نگراں وزیراعظم نے فلسطین سے اظہار یکجہتی کے لیے سال نو کی تقریبات پر پابندی لگا دی۔ایک ویڈیو پیغام میں انوار الحق کاکڑ نے عوام سے نئے سال کی آمد پر غزہ کے مظلوم عوام سے اظہار یکجہتی کے لیے سادگی کا مظاہرہ کرنے کی بھی اپیل کی ہے۔انہوں نے کہا کہ قابض اسرائیلی افواج فلسطین میں تباہی مچا رہی ہے، پوری پاکستانی قوم اور امت مسلمہ معصوم فلسطینیوں کی نسل کشی بالخصوص بچوں کے قتل پر شدید غمزدہ ہے۔انوار الحق کاکڑ نے کہا کہ رواں سال 7 اکتوبر سے اب تک اسرائیلی بربریت میں 9 ہزار بچوں سمیت 21 ہزار سے زائد فلسطینی شہید ہو چکے ہیں۔انوار الحق کاکڑ نے کہا کہ پاکستان نے تمام عالمی فورمز پر فلسطین کے مظلوم عوام کے لیے آواز بلند کی ہے اور آئندہ بھی کرتا رہے گا۔