پاکستان بلاک سیاست پر یقین نہیں رکھتا، آرمی چیف

پاک فوج کے سربراہ جنرل سید عاصم منیر نے کہا ہے کہ پاکستان بلاک کی سیاست پر یقین نہیں رکھتا، تمام دوست ممالک کے ساتھ متوازن تعلقات برقرار رکھنے پر یقین رکھتا ہے۔پاک فوج کے شعبہ تعلقات عامہ (آئی ایس پی آر) کے مطابق آرمی چیف نے یہ بات اپنے دورہ امریکا کے دوران ممتاز امریکی تھنک ٹینکس اور میڈیا سے خصوصی ملاقات کے دوران کہی۔آرمی چیف جنرل سید عاصم منیر نے ممتاز امریکی تھنک ٹینکس اور میڈیا ارکان سے خصوصی گفتگو کے دوران علاقائی سلامتی اور بین الاقوامی دہشت گردی پر پاکستان کا نقطہ نظر پیش کیا۔ملاقات کے دوران آرمی چیف نے جنوبی ایشیا میں سٹریٹجک استحکام کے لیے پاکستان کے نقطہ نظر کو بھی اجاگر کیا۔آرمی چیف جنرل عاصم منیر نے مسئلہ کشمیر کو کشمیری عوام کی امنگوں اور اقوام متحدہ کی قراردادوں کے مطابق حل کرنے کی ضرورت پر زور دیا۔انہوں نے کہا کہ کشمیر ایک بین الاقوامی سطح پر تسلیم شدہ تنازعہ ہے، کشمیری عوام کی خواہشات کے خلاف کوئی بھی یکطرفہ اقدام اس تنازع کی نوعیت کو تبدیل نہیں کر سکتا۔آرمی چیف جنرل عاصم منیر نے غزہ میں دشمنی کے فوری خاتمے پر زور دیتے ہوئے کہا کہ غزہ میں انسانی امداد اور خطے میں دیرپا امن کے لیے دو ریاستی حل پر عمل درآمد ضروری ہے۔انہوں نے کہا کہ پاکستان علاقائی استحکام اور عالمی امن کو یقینی بنانے کے لیے کئی دہائیوں سے بین الاقوامی دہشت گردی کے خلاف جنگ لڑ رہا ہے۔پاک فوج کے سربراہ نے کہا کہ پاکستان نے دہشت گردی کے خلاف جنگ میں بے مثال خدمات اور قربانیاں دی ہیں اور پاکستانی عوام کی مکمل حمایت سے آخری دہشت گرد کے خاتمے تک یہ جنگ جاری رہے گی۔ان کا کہنا ہے کہ پاکستان جیو پولیٹیکل اور جیو اکنامک دونوں لحاظ سے اہم ترین ممالک میں سے ایک ہے، پاکستان وسطی ایشیا کے ممالک کے ساتھ مضبوط تعلقات استوار کرنے میں اہم کردار ادا کرنا چاہتا ہے۔آرمی چیف نے یہ بھی کہا کہ پاکستان طویل المدتی دوطرفہ تعلقات کے ذریعے امریکا کے ساتھ مضبوط تعلقات استوار کرنے کا خواہاں ہے۔دورہ امریکہ کے حوالے سے پاک فوج کے شعبہ تعلقات عامہ نے کہا ہے کہ پاکستان کے سفیر نے آرمی چیف کا امریکہ پہنچنے پر استقبال کیا۔آئی ایس پی آر کا یہ بھی کہنا ہے کہ دورہ امریکہ کے دوران آرمی چیف کی سیاسی و عسکری قیادت سے بات چیت انتہائی مثبت رہی۔