نگران حکومت الیکشن کمیشن کے پیچھے کھڑی ہے، مرتضیٰ سولنگی

نگراں وفاقی وزیر اطلاعات مرتضیٰ سولنگی نے کہا ہے کہ نگراں حکومت الیکشن کمیشن کے پیچھے کھڑی ہے۔اسلام آباد میں ایک تقریب سے خطاب کرتے ہوئے مرتضیٰ سولنگی نے کہا کہ الیکشن کمیشن کو سہولیات فراہم کرنا نگران حکومت کی ذمہ داری ہے۔مرتضیٰ سولنگی نے کہا کہ ساری جنگ معیشت اور معاشیات کی ہے، ہم نے اپنی زیادہ تر ضروریات قرضوں پر چلائی ہیں، سیاسی جماعتوں نے اس گڑھے سے نکلنے کا منشور دیا ہے۔ انہوں نے کہا کہ پی ٹی آئی سے متعلق معاملات کے لیے پی ٹی آئی ہی بہترین ہے۔ الیکشن کمیشن بتا سکتا ہے کہ وہ آزادانہ، منصفانہ، غیر جانبدارانہ اور شفاف انتخابات کرانے کا ذمہ دار ہے۔مرتضیٰ سولنگی نے کہا کہ نگران حکومت آئینی اور قانونی حکومت ہے۔ وہ آئینی طور پر الیکشن کمیشن کی مالی، انتظامی اور سیکیورٹی ضروریات کو پورا کرنے کے پابند ہیں۔انہوں نے کہا کہ سیکیورٹی کے مسائل حقیقی ہیں، ہم ان سے آگاہ ہیں، ہم انہیں بہتر کریں گے، ملک میں سوالات اٹھانے پر کوئی پابندی نہیں، انشاءاللہ انتخابات 8 فروری کو ہوں گے۔مرتضیٰ سولنگی کا مزید کہنا تھا کہ صرف مذاکرات ہمارے مسائل کا حل نہیں، ہمیں تلخ معاملات پر بات کرنے کی ضرورت ہے۔