ماہانہ 200 یونٹ تک صارفین کیلئے بجلی کی قیمت میں اضافہ واپس لینے کی تجویز

حکومت کی جانب سے ماہانہ 200 یونٹ تک صارفین کیلئے بجلی کی قیمت بڑھانے کا فیصلہ واپس لینے کی تجویز سامنے آئی ہے۔حکومت نے عام آدمی کو ریلیف دینے کیلئے ماہانہ 200 یونٹ تک پروٹیکٹڈ اور نان پروٹیکٹڈ صارفین کیلئے بجلی کی قیمت بڑھانے کا فیصلہ واپس لینے کی تجویز دی ہے، اس حوالے سے وزیر اعظم نے ہنگامی بنیادوں پر سمری کی وفاقی کابینہ سے منظوری لینے کی ہدایت کر دی۔ جولائی تا ستمبر 2024 کیلئے ماہانہ 200 یونٹ تک والے صارفین کو ریلیف دینے کی تجویز سامنے آئی ہے، وفاقی حکومت ٹیرف پر ریلیف دینے کیلئے تقریبا 50 ارب روپے کی سبسڈی دے گی۔یاد رہے کہ وفاقی کابینہ نے بجلی کے فی یونٹ بنیادی ٹیرف میں 7 روپے 12 پیسے تک اضافہ منظور کیا تھا، کابینہ نے 200 یونٹ تک پروٹیکٹڈ، نان پروٹیکٹڈ صارفین کیلئے بھی اضافے کی منظوری دی تھی۔ذرائع کے مطابق ایک سے 100 یونٹ تک پروٹیکٹڈ صارفین کے ٹیرف میں 3.95 روپے، ماہانہ 101 سے 200 یونٹ تک پروٹیکٹڈ صارفین کا ٹیرف 4.10 روپے بڑھانے کی منظوری دی گئی تھی۔