صالح العروری کی شہادت اسرائیل کیخلاف مزاحمت کو بڑھائے گی ، ایران

ایران کا کہنا ہے کہ لبنان میں اسرائیلی حملے میں حماس کے رہنما صالح العاروری کی شہادت سے اسرائیل کے خلاف مزاحمت میں مزید اضافہ ہوگا۔ایرانی وزارت خارجہ کے ترجمان کا کہنا ہے کہ اسرائیلی حملہ لبنان کی خودمختاری کی خلاف ورزی ہے۔ایرانی وزارت خارجہ کے ترجمان نے کہا کہ حماس رہنما کے قتل کے بعد فلسطینی تحریک میں ایک نئی جہت پیدا ہوگی۔دوسری جانب لبنانی وزیراعظم نجیب میقاتی نے حملے کی مذمت کرتے ہوئے کہا ہے کہ اسرائیل غزہ میں ناکامی کے بعد لبنان کو محاذ آرائی کے نئے مرحلے پر لے جانا چاہتا ہے۔واضح رہے کہ صالح العروری کی شہادت کی خبر ملتے ہی مغربی کنارے میں فلسطینیوں کی بڑی تعداد سڑکوں پر نکل آئی اور اسرائیلی جارحیت کے خلاف جدوجہد جاری رکھنے کے عزم کا اظہار کیا۔