القادر کیس کا فیصلہ موخر ہونا کسی ڈیل کا نتیجہ نہیں، چیئر مین پی ٹی آئی

راولپنڈی:چیئرمین پی ٹی آئی بیرسٹر گوہر نے اڈیالہ جیل کے باہر سلمان اکرم راجہ کے ہمراہ میڈیا سے گفتگو کرتے ہوئے کہا ہے کہ 190 ملین پانڈز ریفرنس کا فیصلہ نہ آنا کسی ڈیل کا نتیجہ نہیں۔بانی پی ٹی آئی القادر یونیورسٹی کے مالک نہیں بس ٹرسٹی ہیں۔
القادر کیس سیاسی طور پر بنایا گیا، ہمارے ساتھ ناانصافی ہوتی رہی ہے، بانی پی ٹی آئی پر دبا ڈالنے کے لیے بشری بی بی کا نام بھی القادر کیس میں شامل کیا گیا۔بانی پی ٹی آئی کو کیسز کی پرواہ نہیں، ہم فیصلہ سننے کے لیے آج عدالت آئے تھے، بانی پی ٹی آئی کو جیل سے کورٹ تک لانا جیل انتظامیہ کا کام تھا۔
ہمیں فیصلے کا وقت 11 بجے کا دیا گیا تھا اور ہم اسی حساب سے آئے ہیں، ہمیں اعلی عدلیہ سے امید ہے، ہم اعلی عدالت میں جائیں گے، جس طرح باقی کیسز ختم ہوئے یہ کیس بھی ختم ہو گا۔
سلمان اکرم راجہ نے بھیاس موقع پر گفتگو کرتے ہوئے کہا ہے کہ مذاکراتی عمل جاری ہے، سننے میں آرہا ہے کہ تیسری نشست 15 جنوری کو ہو گی، ہم ڈیل نہیں کر رہے، ملک میں جمہوریت اور انصاف کے لیے مذاکرات کر رہے ہیں۔مذاکرات اور اس مقدمے کا آپس میں کوئی تعلق نہیں، تاثر دیا جا رہا ہے کہ ڈیل ہو رہی ہے، ہماری کوئی ڈیل نہیں ہو رہی۔