افغانستان کرکٹ ٹیم کے سابق فاسٹ بولر شاپور زدران طویل علالت کے بعد بھارت میں انتقال کر گئے۔ افغان کرکٹ ذرائع کے مطابق وہ گزشتہ کچھ عرصے سے بھارت کے ایک اسپتال میں زیر علاج تھے۔
ذرائع کے مطابق فی الحال ان کی میت افغانستان کب منتقل کی جائے گی، اس حوالے سے کوئی باضابطہ اعلان سامنے نہیں آیا۔
شاپور زدران کو افغانستان کے ابتدائی اور نمایاں فاسٹ بولرز میں شمار کیا جاتا تھا، جنہوں نے قومی ٹیم کو بین الاقوامی کرکٹ میں مقام دلانے میں اہم کردار ادا کیا۔ انہوں نے افغانستان کی نمائندگی ایک روزہ بین الاقوامی (ون ڈے)، ٹی ٹوئنٹی انٹرنیشنل اور دیگر عالمی مقابلوں میں کی، جہاں اپنی تیز رفتار اور جارحانہ باؤلنگ کے باعث خاصی شہرت حاصل کی۔
اپنے بین الاقوامی کیریئر کے دوران شاپور زدران نے افغانستان کو کئی بڑے عالمی ایونٹس، جن میں آئی سی سی کرکٹ ورلڈ کپ اور آئی سی سی مینز ٹی ٹوئنٹی ورلڈ کپ شامل ہیں، کے لیے کوالیفائی کرانے اور کامیاب مہمات میں اہم کردار ادا کیا۔ انہیں ان کھلاڑیوں میں شمار کیا جاتا ہے جنہوں نے افغانستان کو عالمی کرکٹ میں ایک مضبوط اور مسابقتی ٹیم کے طور پر متعارف کرانے میں نمایاں خدمات انجام دیں۔
شاپور زدران کے انتقال کی خبر سامنے آنے کے بعد افغان کرکٹ برادری، سابق ساتھی کھلاڑیوں، شائقین اور کھیل سے وابستہ شخصیات نے گہرے دکھ اور افسوس کا اظہار کیا۔ سوشل میڈیا پر انہیں خراجِ عقیدت پیش کرتے ہوئے ان کی قومی کرکٹ کے لیے خدمات، جذبے اور یادگار کارکردگی کو سراہا جا رہا ہے۔
کرکٹ حلقوں کا کہنا ہے کہ شاپور زدران کی خدمات کو ہمیشہ یاد رکھا جائے گا اور افغانستان میں کرکٹ کے فروغ کے لیے ان کا کردار تاریخ کا اہم حصہ رہے گا۔