ملک بھر میں تمام سولر صارفین کے لیے نیٹ میٹرنگ پالیسی تبدیل کرنے کا فیصلہ

اسلام آباد: وزارت توانائی نے ملک میں تمام سولر صارفین کے لئے نیٹ میٹرنگ پالیسی تبدیل کرنے کی منظوری دے دی۔ سٹیک ہولڈرز سے مشاورت کے بعد وزارت توانائی نے نیٹ میٹرنگ پالیسی تبدیل کرنے کی منظوری دی، نیٹ میٹرنگ سے نیٹ بلنگ کا نظام متعارف کروایا جارہا ہے، نیٹ بلنگ کے تحت فی یونٹ قیمت 11 روپے ہوگی۔
صارفین سے سولر معاہدہ کی مدت 5 سال کر دی گئی، نیٹ میٹرنگ کی مد میں سولر صارفین کو اضافی سرچارج کی جگہ فی یونٹ تبادلہ ملے گا، نیٹ بلنگ میں صارف کے لیے نئی فی یونٹ قیمت مقرر کی جائے گی۔بتایا گیا ہے کہ صارف کے سولر سے بنائے گئے یونٹس کی قیمت نیپرا مقرر کرے گی، صارف جو یونٹ استعمال کرے گا، اس کا ریٹ نیپرا ٹیرف کے مطابق ہوگا، جو یونٹ سولر سے پیدا ہوں گے ان کا فکس ریٹ ہوگا۔
واضح رہے کہ نیٹ میٹرنگ میں سولر صارف 25 روپے 98 پیسے فی یونٹ قیمت کا فائدہ لیتا تھا، آئندہ 25 کلو واٹ سے کم لوڈ کا لائسنس نیپرا سے لینا لازم ہو گا، پہلے گھریلو صنعتی کمرشل صارفین 25 کلو واٹ تک کو لائسنس سے استثنیٰ تھا۔وزارت توانائی، ڈسکوز اور نیپرا نے کئی ماہ تک مشاورت کے بعد یہ پراسیجر مکمل کیا، وزارت توانائی نے وفاقی حکومت کو بتایا کہ نئی پالیسی کے بنا چلنا ممکن نہیں۔سولر ٹیرف تعین نیپرا ریگولیٹرز کی ذمہ داری ہے، رولز و ٹیرف وقت کے ساتھ تبدیل ہوتے رہتے ہیں، صارفین کو اس سے زیادہ فرق نہیں پڑے گا۔