موسم کی بڑی تبدیلی آنے والی ہے، 20 سے 22 دسمبر تک ملک کے مغربی اور بالائی علاقوں میں گرج چمک، بارش اور برفباری کی پیشگوئی
محکمہ موسمیات نے ملک کے مغربی حصوں میں 20 سے 22 دسمبر کے دوران گرج چمک کے ساتھ بارش اور برفباری کی پیش گوئی کر دی ہے، جبکہ سیاحوں اور مسافروں کو محتاط رہنے کی ہدایت کی گئی ہے۔
19 دسمبر کو مغربی ہواؤں کا ایک سلسلہ بلوچستان میں داخل ہوگا، جس کے اثرات 20 دسمبر سے بالائی علاقوں تک پہنچنے کا امکان ہے۔ خیبر پختونخوا کے مختلف علاقوں میں بارش اور بالائی علاقوں میں درمیانے درجے کی برفباری متوقع ہے۔
اسلام آباد، خطہ پوٹھوہار اور میانوالی میں بھی بارش کا امکان ظاہر کیا گیا ہے، جبکہ مری اور گلیات میں بارش کے ساتھ برفباری بھی متوقع ہے۔ پنجاب کے زیادہ تر میدانی علاقوں میں آسمان ابر آلود رہنے کے ساتھ بوندا باندی بھی ہو سکتی ہے۔
19 اور 20 دسمبر کے دوران سندھ میں مطلع جزوی ابر آلود رہے گا، جبکہ بلوچستان کے مختلف علاقوں میں بارش اور برفباری کی پیش گوئی کی گئی ہے۔ محکمہ موسمیات نے عوام اور سیاحوں سے کہا ہے کہ وہ سفر کے دوران محتاط رہیں اور موسمی حالات پر نظر رکھیں۔