پاک چین دوستی فولاد کی طرح مضبوط اور آزمودہ: مریم نواز

بیجنگ:وزیراعلی پنجاب مریم نواز نے بیجنگ میں کیمونسٹ پارٹی آف چائنہ کے انٹرنیشنل ڈیپارٹمنٹ کے منسٹر لیو جیان چا سے ملاقات کی، پرتپاک خیر مقدم کرنے پر منسٹر لیو جیان چا کا شکریہ ادا کیا اور کیمونسٹ پارٹی آف چائنہ کی دور اندیش قیادت کو سراہا۔اس موقع پر انہوں نے گفتگو کرتے کہا کہ پاک چین دوستی فولاد کی طرح مضبوط اور آزمودہ ہے۔چینی لیڈرشپ نے چین کو عالمی طاقت کے طور پر ابھرنے میں رہنمائی فراہم کی، پاک چین تعلقات کے فروغ میں کیمونسٹ پارٹی آف چائنہ کا کردار کلیدی حیثیت رکھتا ہے۔
مریم نواز نے کہا کہ پاک چین کمیونٹی کی تشکیل میں عوامی سطح پر بڑھتے ہوئے رابطے اہم کردار ادا کررہے ہیں، پاک چین دوستی علاقائی اور بین الاقومی سیاست کے نشیب وفراز سے متاثر نہ ہونے والا پائیدار تعلق ہے، دوطرفہ سٹریٹجک پارٹنر شپ ہر موسم کے گرم وسرد سے بالا تر ہے۔وزیر اعلیٰ نے لوکل گورننس اور دیہی ترقی کیلئے چین کے تجربات سے فائدہ اٹھانا چاہتے ہیں، یوتھ ایمپاورمنٹ اور استعداد میں اضافے کیلئے چین کے تعاون کو سراہیں گے، ووکیشنل ٹریننگ پروگرام کے سلسلے میں چین سے بھرپور تعاون چاہتے ہیں، بڑھتے ہوئے عوامی روابط اور ثقافتی تعلقات شاہراہ ریشم کا ورثہ اور میراث ہے۔
چین اور پنجاب کے ثقافتی روابط کیلئے پائیدار اقدامات کریں گے، پاک چین تعلقات کی میراث کو پروان چڑھانے کیلئے نوجوان نسل پر توجہ دینا ہو گی۔کیمونسٹ پارٹی آف چائنہ کے انٹرنیشنل ڈیپارٹمنٹ کے منسٹر لیو جیان چا نے وزیر اعلی مریم نوازشریف کی آمد پر شکریہ ادا کیا جبکہ وزیر اعلی مریم نواز نے شاندار میزبانی پر منسٹر لیو جیان چاسے اظہار تشکر کیا ۔