چاہت فتح علی میوزک اور اداکاری کی تربیت بھی دیں گے، اکیڈمی کھول لی

لندن:سوشل میڈیا کے مضحکہ خیز گلوکار چاہت فتح علی نے میوزک اور اداکاری کی تربیت دینے کیلئے اکیڈمی کھول لی۔لندن میں صحافیوں سے گفتگو کرتے ہوئے چاہت فتح علی نے بتایا کہ پہلے میوزک کی اکیڈمی کھولی تھی اب اسی جگہ پر اداکاری کی کلاسز بھی دی جائیں گی۔
اکیڈمی کھولنے کا بنیادی مقصد نئے فنکاروں کو آگے لے کر آنا اور موقع دینا ہے۔چاہت فتح علی نے کہا مجھے شروع سے انٹرٹینمنٹ انڈسٹری کا شوق تھا مگر 10 سال پہلے احساس ہوا کہ میں اسی انڈسٹری کا آدمی ہوں اور مجھے اپنی محنت لگن دعاں پر بھروسہ تھا اور یہی میری کامیابی کی وجہ بھی ہے جس کی وجہ سے مقام حاصل کروں گا۔
اکیڈمی آنے والوں کا سب سے پہلے لب و لہجہ ٹھیک کروایا جائے گا اور انہیں اردو، انگریزی، پنجابی سکھائی جائے گی کیونکہ اداکاری کیلئے ان تین زبانوں پر عبور حاصل کرنا ضروری ہے۔مجھے نظر آرہا ہے کہ مستقبل میں تمام بڑے فلم ساز مجھ سے خود رابطہ کریں گے کیونکہ میں اپنی اکیڈمی کے سنگرز، اداکاروں کی سوشل میڈیا پر خود ہی پذیرائی کروں گا۔
مجھے نہیں معلوم گلوکار کیوں مجھ سے تحفظات کا شکار ہیں جبکہ میں تو بس محنت پر یقین رکھتا ہوں اور 10 برسوں سے یہی کر رہا ہوں۔میں نے دو سال پہلے ایک فلم کی تھی جبکہ ایک بڑی سکرین والی فلم (دی ڈارلنگ) اسی سال کے آخر میں آئے گی جسے پاکستان کے 50 سینما گھروں میں ریلیز کیا جائے گا۔