پنجاب پولیس پیپلزپارٹی کو نشانہ بنارہی ہے ، شیری رحمن

شیری رحمان نے کہا ہے کہ پنجاب پولیس پیپلز پارٹی کو نشانہ بنا رہی ہے۔ایک بیان میں شیری رحمان نے کہا کہ این اے 127 لاہور میں پیپلز پارٹی کے نمائندوں کی گرفتاری قابل مذمت ہے، بلاول بھٹو زرداری اس حلقے سے الیکشن لڑ رہے ہیں۔انہوں نے کہا کہ چند روز قبل ہمارے الیکشن آفس پر پٹرول بموں سے حملہ کیا گیا، پنجاب پولیس ہمارے نمائندوں اور سپورٹرز کو گرفتار کر رہی ہے، پیپلز پارٹی میں شامل ہونے والے شہزاد اور شہباز کو پولیس نے گرفتار کیا۔شیری رحمان کا کہنا ہے کہ مسلم لیگ ن سے پیپلز پارٹی میں شامل ہونے والی خدیجہ پروین کو بھی گزشتہ روز پنجاب پولیس نے گرفتار کیا تھا۔رہنما پیپلز پارٹی کا کہنا تھا کہ شہزاد، شہباز اور خدیجہ پروین کو فوری رہا کیا جائے، ہم الیکشن کمیشن سے مطالبہ کرتے ہیں کہ پنجاب میں پولیس کی بربریت کا نوٹس لیا جائے۔