پاک ،جاپان کے مابین وفود کے تبادلوں سے تعلقات کو وسعت ملے گی: گورنر پنجاب

لاہور:گورنر پنجاب سردار سلیم حیدر خان سے پاکستان میں جاپان کے سفیر اکاماتسو شوئی چی کی ملاقات ہوئی، ملاقات میں معیشت، زراعت اور ثقافت کے شعبوں میں تعاون کو فروغ دینے پر تفصیلی تبادلہ خیال کیا گیا۔ گورنر پنجاب سردار سلیم حیدر خان نے کہا ہے کہ جاپان کو ہر سیکٹر میں سرمایہ کاری کے لئے خوش آمدید کہتے ہیں، صدر پاکستان آصف علی زرداری کے ویژن کے مطابق پاکستان اور جاپان کے درمیان تعلقات کو نئی بلندیوں تک لے کر جائیں گے۔
پاکستان میں زرخیز زمین اور آب و ہوا کی وجہ سے یہاں کے پھلوں اور سبزیوں کا ذائقہ پوری دنیا میں مشہور ہے، صوبہ پنجاب میں زراعت کے شعبے میں جاپان کی مہارتوں سے استفادہ کرنے میں دلچسپی رکھتے ہیں۔پاکستان میں جاپانی گاڑیاں بہت پسند کی جاتی ہیں، جاپانی کمپنیاں آٹو موبائل سیکٹر سمیت پاکستان میں مختلف شعبوں میں اقتصادی مواقع سے فائدہ اٹھا سکتی ہیں،
پاکستان اور جاپان کے مابین کاروباری اور ثقافتی وفود کے تبادلوں سے دو طرفہ تعلقات کو مذید وسعت ملے گی، ٹیکسلا میوزیم میں نوادرات کے تحفظ کے لئے جاپانی حکومت کے تعاون کو قدر کی نگاہ سے دیکھتے ہیں۔