لاہور:پاکستان مسلم لیگ ن کے صدر اور سابق وزیراعظم محمد نواز شریف نے زندگی کی 75 بہاریں دیکھ لیں۔کشمیری گھرانے سے تعلق رکھنے والے سابق وزیراعظم نواز شریف 25 دسمبر1949 کو لاہور میں پیدا ہوئے، گورنمنٹ کالج سے تجارت کی تعلیم حاصل کی اور 1970 کی دہائی کے آخر میں سیاست کا آغاز کرنے سے پہلے پنجاب یونیورسٹی لا کالج سے قانون کی تعلیم حاصل کی۔
نواز شریف نے اپنے سیاسی کیریئر کا آغاز 1981 میں وزیر خزانہ پنجاب کی حیثیت سے کیا، بعد ازاں 1985 تا 1990 وزیراعلی پنجاب رہے، نواز شریف 1990 تا 1993، 1997 تا 1999 اور تیسری بار 2013 تا 2017 وزیر اعظم کے عہدے پر فائز رہے۔ایٹمی دھماکوں کے جواب میں 28 مئی 1998 کو 5 کامیاب دھماکے کر کے ملک کو دنیا کی ساتویں اور اسلامی ملکوں کی واحد ایٹمی طاقت بنانا نواز شریف کا اہم کارنامہ ہے۔2006 میں بینظیر بھٹو سے مل کر میثاق جمہوریت پر دستخط کر کے فوجی حکومت کے خاتمے کا عزم کیا، تین بار پاکستان کے وزیراعظم رہنے والے میاں نوازشریف ایک بار بھی اپنے عہدے کی آئینی مدت پوری نہ کر سکے۔