قائداعظم جیسے لیڈر ہی ملکوں کی تقدیر بدلتے ہیں: وزیر داخلہ

اسلام آباد:وفاقی وزیر داخلہ محسن نقوی نے قائداعظم کے یوم پیدائش پر اپنے پیغام میںکہا ہے کہ پاکستان کی تخلیق میں قائداعظم کا ابدی کردار سنگ میل کی حیثیت رکھتا ہے، قائداعظم جیسے سچے، ایماندار اور دیانتدار لیڈر ہی ملکوں کی تقدیر بدلتے ہیں۔
مسلم دنیا کے مدبر اور عظیم رہنما محمد علی جناح کو خراج عقیدت پیش کرتے ہیں، یہ دن پاکستان کو قائداعظم کے ویژن کے مطابق عظیم ملک بنانے کے عہد کا متقاضی ہے، اتحاد، بھائی چارہ، مذہبی رواداری اور بقائے باہمی آج کے دن کا پیغام ہے۔
قائداعظم نے اقلیتوں کے حقوق اور مذہبی آزادی کی اہمیت پر بہت زور دیا، بانی پاکستان اقلیتوں کے حقوق کے تحفظ اور مذہبی رواداری کے علمبردار تھے، بحیثیت قوم ہمیں اقلیتوں کے حقوق اور مذہبی رواداری کے فروغ کیلئے قائداعظم کے اصولوں پر کاربند رہ کر آگے بڑھنا ہے، ہمیں قومی مفاد میں ذاتی اختلافات کو پس پشت ڈال کر وطن عزیز کا سوچنا ہے۔
قائداعظم نے اپنی ولولہ انگیز قیادت میں برصغیر کے مسلمانوں کے حقوق کیلئے تاریخ کا دھارا بدلا، قائداعظم نے مسلمانوں کو ایک پلیٹ فارم پر اکٹھا کیا اور آزاد مسلم ریاست کے خواب کو عملی تعبیر دی، ان کی انتھک جدوجہد کی بدولت آج ہم آزاد وطن میں سانس لے رہے ہیں اور بانی پاکستان کا یہ احسان تاقیامت نہیں اتار سکتے۔
پاکستان کی تخلیق میں قائداعظم کا ابدی کردار سنگ میل کی حیثیت رکھتا ہے، قائد اعظم نے تحمل، برداشت، مساوات اور رواداری پر مبنی معاشرے کا خواب دیکھا تھا، ایسے فلاحی معاشرے کیلئے سب کو مل کر اپنی توانائیاں بروئے کار لانا ہوں گی تاکہ قائد کے خواب کو عملی جامہ پہنایا جا سکے۔