سوشل میڈیا سٹار ثنا یوسف کے قاتل کا اعتراف جرم

اسلام آباد:17 سالہ سوشل میڈیا انفلوئنسر ثنا یوسف کے قتل میں گرفتار نوجوان عمر حیات نے عدالت کے روبرو اپنے جرم کا اعتراف کر لیا۔قاتل نے یہ بھی تسلیم کیا کہ اس کی یہ حرکت غصے اور انتقام کے زیرِ اثر کی گئی تھی کیونکہ ثنا نے اس سے ملنے سے انکار کر دیا تھا۔
میڈیا رپورٹس کے مطابق 22 سالہ عمر حیات کو آج جوڈیشل مجسٹریٹ سعد نذیر کی عدالت میں پیش کیا گیا جہاں اس نے تعزیرات پاکستان کی دفعہ 164 کے تحت اعترافی بیان ریکارڈ کروایا۔بیان میں ملزم نے اعتراف کیا کہ وہ ثنا کے ساتھ ملاقات کرنا چاہتا تھا لیکن اس کے مسلسل انکار نے اسے اس حد تک مشتعل کیا کہ اس نے قاتلانہ قدم اٹھا لیا۔
ملزم کے مطابق پہلی بار جب وہ ثنا کے گھر ملاقات کے لیے گیا تو سارا دن انتظار کرتا رہا مگر ثنا نے اسے دیکھنے سے بھی انکار کر دیا اور واپس جانے کا کہہ دیا، وہ ثنا کی سالگرہ کے لیے تحفہ بھی لے کر گیا تھا لیکن وہ بھی مسترد کر دیا گیا۔بیان کے مطابق 2 جون کو ثنا نے دوبارہ ملاقات کے لیے بلایا لیکن تب بھی بات نہ بن سکی جس پر وہ شدید غصے میں آ گیا،وہ طیش میں آ کر ثنا کے گھر گھس گیا اور سینے پر دو گولیاں مار کر اسے قتل کر ڈالا۔