کراچی: چیئرمین پاکستان پیپلز پارٹی نے دریائے سندھ پر نئی نہروں کے وفاقی منصوبے کے حوالے سے ویڈیو بیان میںکہا ہے کہ اپنی رائے کو زبردستی نافذ کرنے سے منفی اثرات مرتب ہوں گے، دریائے سندھ پر مزید نہروں کا وفاقی منصوبہ کالا باغ ڈیم کی طرح متنازع ہوجائے گا، اگر سندھ اور بلوچستان کے اعتراضات نہ سنے گئے تو اس پورے منصوبے کو متنازع بنائیں گے۔بلاول بھٹو نے تجویز دی کہ متنازع منصوبوں کو شروع کرنے کے بجائے تمام سٹیک ہولڈرز کو اعتماد میں لیں، شراکت داروں سے بات چیت کر کے اتفاق رائے قائم کریں، زبردستی رائے مسلط کرنے سے سیاست، زراعت اور معیشت متاثر ہوگی۔
چیئرمین پی پی کا کہنا تھا کہ کوشش ہے کالا باغ ڈیم کی طرح متنازع منصوبہ نہ بنائیں، اگر اعتراضات دور نہیں کیے گئے تو یہ پورا منصوبہ متنازع ہو جائے گا جس طرح کالا باغ ڈیم منصوبہ متنازع ہوا، وفاقی حکومت ایسا قدم نہ اٹھائے جس سے اچھے منصوبے متنازع بن جائیں، مل کر وہ فیصلے کریں جو ملک کے فائدے کے لیے ہوں۔
سابق وزیر خارجہ نے کہا کہ وفاقی حکومت اپنے فیصلے پرغور کرے، ہم وفاقی حکومت کو سمجھانے کی کوشش کریں گے، پیپلز پارٹی گرین سندھ کا منصوبہ وفاقی حکومت سے شیئر کرے گی، وفاقی حکومت بھی اپنے پوائنٹس ہم سے شیئر کرے۔
بلاول بھٹو نے مزید کہا کہ پیپلز پارٹی زراعت کو معیشت کی ریڑھ کی ہڈی سمجھتی ہے، ہم نے زراعت کو سپورٹ کرنے کا منصوبہ بنایا ہے، سندھ کو سرسبز بنانے کے منصوبے کی کامیابی کے خواہاں ہیں، کسانوں کو سندھ سرسبز منصوبے سے فائدہ دینا چاہتے ہیں، پہلے مرحلے میں آباد علاقوں میں کوآپریٹیو فارمنگ شروع کرنا چاہتے ہیں۔