انٹونی بلینکن نے کہا کہ یہ خطے میں شدید کشیدگی کا وقت ہے

امریکی وزیر خارجہ انتھونی بلینکن کا کہنا ہے کہ یہ خطے میں شدید کشیدگی کا وقت ہے اور حوثیوں کے حملے کے بعد میری ٹائم سیکیورٹی کا دفاع جاری رکھیں گے۔قطر کے دارالحکومت دوحہ میں امریکی اور قطری وزرائے خارجہ نے مشترکہ پریس کانفرنس کی۔امریکی وزیر خارجہ نے کہا کہ غزہ میں امداد کی ترسیل کی راہ میں بہت سی رکاوٹیں ہیں، اسرائیل شہریوں کی اموات میں کمی کی بات کرے گا، غزہ میں کئی صحافی بھی مارے جاچکے ہیں۔انٹونی بلینکن نے کہا کہ فلسطینی شہریوں کو اپنے گھروں کو لوٹنے کے قابل ہونا چاہیے، غزہ والوں کو غزہ چھوڑنے پر مجبور نہ کیا جائے۔اس موقع پر قطری وزیر خارجہ محمد بن عبدالرحمن نے کہا کہ حماس رہنما کے قتل سے قطر کی ثالثی کی کوششیں متاثر ہوئی ہیں۔ قطر اسرائیل حماس مذاکرات کے لیے کوششیں جاری رکھے گا۔قطری وزیر خارجہ نے کہا کہ بحیرہ احمر کی کارروائیوں سے غزہ جنگ پر برے اثرات مرتب ہو رہے ہیں، غزہ میں شہریوں کی ہلاکتیں انسانیت کا بہت بڑا امتحان ہے۔