اسلام آباد: عمران خان کی نااہلی کے خلاف تحریک انصاف کے کارکنوں کے احتجاج پر پی ٹی آئی کی مقامی قیادت کے خلاف انسداد دہشت گردی کا مقدمہ درج کر لیا گیا۔
سربراہ پاکستان تحریک انصاف عمران خان کی نااہلی کے خلاف احتجاج کرنے پر اسلام آباد کی مقامی انصافی قیادت کے خلاف انسداد دہشت گردی کے تحت مقدمہ درج کر لیا گیا۔
مقدمہ سرکار کی مدعیت میں اسلام آباد کے تھانہ آئی نائن میں درج کیا گیا، جس میں عامر کیانی، قیوم عباسی، فیصل جاوید، اور راجہ راشد حفیظ کو نامزد کیا گیا ہے، اس کے علاوہ عمر تنویر بٹ، راشد نسیم عباسی اور راجہ ماجد کو بھی مقدمے میں نامزد کیا گیا ہے۔
ایف آئی آر کے متن کے مطابق تحریک انصاف کے کارکنوں نے پولیس، ایف سی اور انتظامیہ پر پتھراؤ کیا، جس سے متعدد پولیس اور ایف سی اہلکار زخمی ہوئے، مقدمے کے متن میں کہا گیا کہ مظاہرین نے قتل کی نیت سے پولیس اہلکاروں پر اپنی گاڑیاں چڑھانے کی شرانگیزی کی۔
ایف آئی آر کے متن میں مزید کہا گیا کہ مظاہرین نے فیض آباد اور ملحقہ علاقوں میں درختوں کو نذر آتش کیا جبکہ سرکاری املاک کو بھی تباہ کرنے کی کوشش کی۔