پلے بوائے کیلئے صادق اور امین کا سرٹیفکیٹ برقرار رکھا جارہا ہے ، جاوید لطیف

جاوید لطیف نے کہا ہے کہ پلے بوائے کے لیے صادق اور امین کا سرٹیفکیٹ برقرار رکھا جا رہا ہے۔لاہور میں میڈیا سے گفتگو کرتے ہوئے جاوید لطیف نے کہا کہ ملک میں معاشی، سیاسی اور خارجہ سطح پر غیر یقینی کی صورتحال ہے، پالیسی ساز اپنی غلطی تسلیم نہیں کر رہے۔انہوں نے کہا کہ سوشل میڈیا پر بیانیے بنانے والوں پر کروڑوں روپے خرچ کیے گئے، کوئی تحقیق کرتا تو معلوم ہوتا کہ 9 اور 10 مئی کے تانے بانے کن ممالک سے آتے ہیں، کیا ملک کی مسلح افواج کو ڈرایا جا سکتا ہے۔انہوں نے کہا کہ سات آٹھ ماہ گزر گئے، مٹی ڈالو پروگرام اب نہیں چل سکتا، 2018 میں ظلم کا سورج نیزے پر تھا، کیا ذوالفقار علی بھٹو اور نواز شریف نے دفاعی اداروں پر حملہ کیا؟رہنما مسلم لیگ کا کہنا تھا کہ آج انتخابی نشان کے معاملے پر بہت شور ہے، ہمارے لیے کوئی نہیں بولا، بری ہونے والوں کے سر پر نااہلی کی تلوار لٹک رہی ہے۔ان کا مزید کہنا تھا کہ چکوال کی ایک شخصیت نے مجھ پر بہت تشدد کیا، میں نے آج تک چکوال کی اس شخصیت کا نام نہیں لیا۔