پنجاب ریونیو اتھارٹی کے اندر ایک خصوصی یونٹ قائم کیا جائے گا جس کا مقصد ٹیکس وصولی کو بڑھانا، کارکردگی کو بہتر بنانا، ٹیکس کی بنیاد کو وسیع کرنا اور صوبے بھر میں بہتر تعمیل کو یقینی بنانا ہے۔ یہ فیصلہ وزیر اعلیٰ پنجاب مریم نواز شریف کی زیر صدارت ریونیو کی وصولی سے متعلق اعلیٰ سطحی اجلاس میں کیا گیا۔ خصوصی یونٹ میں فیلڈ افسران، ٹیکس کنسلٹنٹس، قانونی ماہرین اور ڈیٹا تجزیہ کار شامل ہوں گے۔
اتھارٹی کے دائرہ اختیار کو 30 اضلاع تک بڑھانے کا فیصلہ کیا گیا، اس کے علاوہ اتھارٹی کے اندر 130 انفورسمنٹ افسران کی بھرتی کی بھی منظوری دی گئی۔ وزیراعلیٰ مریم نے ریونیو اتھارٹی کو تمام اضلاع تک توسیع دینے کے لیے 30 اکتوبر کی ڈیڈ لائن مقرر کر دی۔ پنجاب میں ریونیو کلیکشن بڑھانے کی کوششوں کے تحت 19 نئے سیکٹرز کو ٹیکس نیٹ میں شامل کرنے کی تجویز کا جائزہ لیا گیا۔ اتھارٹی سے متعلق اضافی ذمہ داریاں اضلاع میں ایڈیشنل ڈپٹی کمشنرز (جنرل) کو سونپی گئی ہیں۔ اتھارٹی نے ٹیکس دہندگان کی مدد کے لیے ایک سہولت ایپ بھی شروع کی ہے۔ وزیراعلیٰ نے ٹیکس ریونیو میں شفافیت کی اہمیت پر زور دیتے ہوئے حکام کو ہدایت کی کہ وہ ایماندار ٹیکس دہندگان کو ہراساں نہ کریں۔