راولپنڈی:چیئرمین پی ٹی آئی بیرسٹر گوہر نے اڈیالہ جیل کے باہر میڈیا کے نمائندوں سے بات کرتے ہوئے کہا ہے کہ ڈی چوک سے لاپتا 200 افراد کی فہرست تیار ہے، یہ رپورٹ عمران خان کو دیں گے۔پی ٹی آئی نے ڈی چوک احتجاج کے دوران 200 مسنگ پرسنز کی فہرست تیار کر لی ہے ، جس پر پی ٹی آئی اپنا کام کر رہی ہے ۔ یہ معاملہ ہر فورم پر اٹھائیں گے اور اس کی رپورٹ بانی پی ٹی آئی کو دیں گے۔
بیرسٹر گوہر نے کہا کہ پی ٹی آئی کا 2019 میں مدارس رجسٹریشن کا معاہدہ درست تھا۔ تحریک انصاف اس معاہدے پر آج بھی قائم ہے ۔ مدارس کی رجسٹریشن ہونی چاہیے۔ مدارس میں بچوں کو جدید علوم بھی پڑھائے جانے چاہییں۔چیئرمین پی ٹی آئی نے کہا کہ فیصل واوڈا اکثر ایسے بیانات دیتے رہتے ہیں۔ میں ان کے کسی بیان کا جواب نہیں دیتا۔ سب کو بانی پی ٹی آئی کی رہائی کی کوشش کرنی چاہیے۔ بانی پی ٹی آئی کی زندگی ہمارے لیے اہم ہے۔ میں پارٹی کو سامنے رکھتے ہوئے ذمے دارانہ بیان دیتا ہوں اور اس میں کور کمیٹی اور دیگر قیادت کے ساتھ مکمل مشاورت کے بعد بیان دیتا ہوں۔