افغانستان میں تباہ طیارے نے پاکستانی فضائی حدود بھی استعمال کی تھی

افغانستان میں گر کر تباہ ہونے والے طیارے نے بھارت سے تاشقند جاتے ہوئے پاکستانی فضائی حدود کو بھی استعمال کیا۔سول ایوی ایشن (سی اے اے) ذرائع کا کہنا ہے کہ افغان صوبے بدخشاں میں گر کر تباہ ہونے والے روسی ایمبولینس طیارے نے بھی پاکستانی سرحدیں استعمال کیں تاہم پائلٹ نے کسی ہنگامی صورتحال کی اطلاع نہیں دی۔دوسری جانب افغان وزارت ٹرانسپورٹ کے مطابق حادثے میں پائلٹ سمیت 4 مسافر بال بال بچ گئے، 2 لاپتہ مسافروں کی تلاش جاری ہے۔واضح رہے کہ روسی ایوی ایشن حکام کے مطابق طیارے میں روسی مریض سمیت 6 افراد سوار تھے۔روسی ایوی ایشن حکام نے بتایا کہ طیارہ تھائی لینڈ سے بھارت اور ازبکستان کے راستے روس جا رہا تھا، جب پائلٹ نے ایندھن کم ہونے کی اطلاع دی اور تاجکستان میں لینڈ کرنے کی کوشش کی تو ریڈار سے غائب ہو گیا۔حکام کا کہنا ہے کہ حادثے کی تحقیقات جاری ہیں۔