کرونا کے بڑھتے کیسز کھیلوں پر اثرانداز ہونے لگے

لاہور: صوبائی دارالحکومت سمیت پنجاب میں کرونا کے بڑھتے کیسز نے تعلیم کے ساتھ ساتھ کھیلوں کی سرگرمیوں کو بھی متاثر کیا ہے، کھیلوں سے متعلق حکومت پنجاب نے اب بڑا فیصلہ کیا ہے۔

وزیراعلیٰ پنجاب سردار عثمان بزدار کی جانب سے جاری بیان کے مطابق پنجاب میں 24گھنٹوں میں کروناکے1632نئےمریض سامنےآئے جبکہ 36مریضوں کاانتقال ہوا۔

وزیراعلیٰ پنجاب نے کرونا وائرس کے بڑھتےہوئےکیسز اور احتیاطی اقدامات کے لئے آج کابینہ کمیٹی انسداد کروناکا اہم اجلاس طلب کیا ہے، اجلاس سے قبل حکومت پنجاب کی جانب سے کھیلوں کی سرگرمیاں بند کرنے کے احکامات جاری کردئیے گئے ہیں۔
یہ بھی پڑھیں: کورونا وائرس؛ پنجاب کے تمام کھیلوں کے میدان بند کرنے کا حکم

فوری طور پر لاہور میں جاری قومی ہاکی ٹیم کا اسکلز کیمپ بندکرنے کا فیصلہ کیا گیا ہے، کیمپ حکومت پنجاب کی احکامات کی روشنی میں بند کرنےکا فیصلہ کیا گیا اور کیمپ میں شامل کھلاڑیوں کو گھروں کو جانے کی اجازت دے دی گئی ہے۔

اس سے قبل آٹھ مارچ کو لاہور میں جاری پاکستان کرکٹ بورڈ کے ہائی پرفارمنس کیمپ کو بھی ختم کردیا گیا تھا، اس کےعلاوہ ہائی پرفارمنس سینٹر میں ویمن کرکٹرز کا فٹنس ٹیسٹ بھی ختم کر دیا گیا تھا۔

کیمپ ختم کرنے کا فیصلہ پی سی بی عملے میں ایک رکن کا ٹیسٹ مثبت آنے پر کیا گیا تھا ،جس کے بعد پی سی بی کے تمام اسٹاف کے کرونا ٹیسٹ کرانے کا فیصلہ بھی کیا گیا۔