’جھوٹا‘ الزام لگانے والی ایک اور خاتون کی علی ظفر سے معافی

علی ظفر پر نامناسب انداز میں جسم کو چھونے کا الزام لگانے والی ایک اور خاتون نے بھی گلوکار سے معافی مانگ لی۔

حمنہ رضا نامی خاتون نے علی ظفر سے اپنی ایک ٹوئٹ کے ذریعے معافی مانگتے ہوئے اعتراف کیا کہ انہوں نے غلط فہمی کی بنیاد پر گلوکار پر الزام لگایا۔

حمنہ رضا نے اپنی ٹوئٹ میں ہاتھ سے لکھے گئے معافی نامے اور کمپوز کیے گئے معافی نامی کی تصویر بھی شیئر کی اور معافی نامہ جاری کرتے ہوئے انہوں نے علی ظفر کو بھی ٹیگ کیا۔

خاتون کی جانب سے معافی مانگے جانے کی ٹوئٹ کو علی ظفر نے بھی ری ٹوئٹ کیا اور عوام کے سامنے معذرت کرنے پر خاتون کی بہادری کی تعریف بھی کی۔

علی ظفر نے خاتون کی ٹوئٹ کو ری ٹوئٹ کرتے ہوئے لکھا کہ عام طور پر عوام کے سامنے معافی مانگے جانے کو عام طور پر کمزوری سمجھا جاتا ہے لیکن درحقیقت یہی خوبی انسان کو خوبصورت بناتی ہے کہ وہ اپنی غلطیوں کی عوام کے سامنے معافی مانگ رہا ہے۔