پنجاب اور سندھ میں ڈینگی کیسز میں اضافہ

لاہور/ کراچی: صوبہ پنجاب اور سندھ میں ڈینگی کیسز میں اضافہ دیکھا جارہا ہے، ستمبر کے مہینے میں سینکڑوں ڈینگی کیسز رپورٹ ہوئے۔ تفصیلات کے مطابق محکمہ سندھ پنجاب کا کہنا ہے کہ گزشتہ 24 گھنٹے کے دوران پنجاب میں ڈینگی کے 176 مریض رپورٹ ہوئے، سیکریٹری صحت عمران سکندر کا کہنا ہے کہ لاہور سے ڈینگی کے 131 مریض رپورٹ ہوئے۔

سیکریٹری صحت کا کہنا ہے کہ رواں سال پنجاب میں ڈینگی کے 2 ہزار 189 کیس رپورٹ ہوچکے ہیں، پنجاب کے اسپتالوں میں ڈینگی کے 335 مریض داخل ہیں جن میں سے صرف لاہور کے اسپتالوں میں ڈینگی کے 158 مریض داخل ہیں۔ دوسری جانب صوبہ سندھ میں بھی ستمبر میں ڈینگی کے 603 کیسز رپورٹ کیے گئے، محکمہ صحت سندھ کا کہنا ہے کہ ضلع وسطی میں ستمبر میں 140 کیسز رپورٹ اور ضلع جنوبی میں 48 کیسز رپورٹ ہوئے۔

محکمہ صحت کے مطابق شرقی میں 86، کورنگی میں 44، ضلع غربی میں 47 اور ضلع ملیر میں 29 کیسز سامنے آئے۔
سندھ کے دیگر شہروں میں سے مٹیاری میں ستمبر میں سب سے زیادہ 145 کیسز رپورٹ ہوئے، حیدر آباد میں 21، تھر پارکر میں 34، میرپور خاص اور بدین میں 2، 2 کیسز جبکہ سکھر، خیر پور اور کشمور میں 1، 1 کیس رپورٹ کیا گیا۔