چین کا پاکستان کے لیے کرونا ویکسین کی مزید 5 لاکھ ڈوزز کا تحفہ

اسلام آباد: چین کی جانب سے پاکستان کو کرونا ویکسین کی مزید 5 لاکھ ڈوزز کا تحفہ دیا جائے گا، چین اب تک پاکستان کو ویکسین کی 15 لاکھ ڈوزز بطور تحفہ فراہم کر چکا ہے۔ تفصیلات کے مطابق چین کی جانب سے پاکستان کو کرونا وائرس ویکسین کی مزید 5 لاکھ ڈوزز کا تحفہ دینے کا فیصلہ کیا گیا ہے، ذرائع کا کہنا ہے کہ چین سائنو فارم ویکسین کی 5 لاکھ ڈوزز بطور تحفہ فراہم کرے گا۔

ذرائع کا مطابق چین سے کرونا وائرس ویکسین کا تحفہ رواں ماہ پاکستان پہنچنے کا امکان ہے، وزارت خارجہ نے وزارت صحت کو چینی ویکسین کے تحفے سے آگاہ کردیا ہے۔ چین اب تک پاکستان کو ویکسین کی 15 لاکھ ڈوزز بطور تحفہ فراہم کر چکا ہے۔

دوسری جانب ملک بھر میں کرونا وائرس کی تیسری لہر کی تباہ کاریاں جاری ہیں، نیشنل کمانڈ اینڈ آپریشن سینٹر کا کہنا ہے کہ گزشتہ 24 گھنٹوں کے دوران کرونا وائرس کے 4 ہزار 318 نئے کیسز سامنے آئے۔ ملک میں مجموعی کرونا کیسز کی تعداد 7 لاکھ 29 ہزار 920 ہوچکی ہے جبکہ کرونا وائرس کے فعال کیسز کی تعداد 76 ہزار 34 ہوگئی۔

این سی او سی کے مطابق گزشتہ 24 گھنٹوں کے دوران کرونا وائرس کے مزید 118 مریض جاں بحق ہوگئے جس کے بعد ملک میں کرونا وائرس سے اموات کی تعداد 15 ہزار 619 ہوگئی۔ وفاقی وزیر برائے منصوبہ بندی اسد عمر کا کہنا ہے کہ اس وقت پاکستان میں تقریباً 13 لاکھ سے زائد افراد کی ویکسی نیشن ہوچکی ہے، ملک میں روزانہ 60 سے 70 ہزار ویکسین لگائی جارہی ہیں۔

اسد عمر کے مطابق عید کے بعد ویکسین کی فراہمی کو مزید تیز کیا جائے گا، ویکسین کے لیے 350 ملین ڈالر رکھے گئے ہیں، ابھی تک 150 ملین ڈالر ویکسین کے لیے استعمال کر چکے ہیں۔