“پاک افواج پاکستان کی سلامتی کی ضامن ہے”

کراچی: وفاقی وزیر داخلہ شیخ رشید کا کہنا ہے کہ پاک افواج میں شمولیت کسی بھی جوان اور اسکےخاندان کیلئے فخر کی بات ہے۔

وفاقی وزیر داخلہ شیخ رشید نے کراچی میں سندھ رینجرز کی28ویں پاسنگ آؤٹ میں بطور مہمان خصوصی شرکت کی ، جہاں انہوں نے پریڈ کا معائنہ کیا اور شرکا ومہمانوں سے خطاب کیا۔

تقریب سے خطاب کرتے ہوئے وفاقی وزیر داخلہ شیخ رشید نے کہا کہ سندھ رینجرز کا کراچی میں امن اور ترقی میں کرداربہت نمایاں ہے، یہی نہیں کراچی میں کھیلوں خصوصی کرکٹ کی بحالی میں سندھ رینجرز کا کردار قابل ستائش ہے۔

وفاقی وزیر داخلہ نے کہا کہ پاک افواج پاکستان کی سلامتی کی ضامن ہے، پاک افواج میں شمولیت کسی بھی جوان اور اسکےخاندان کیلئےفخر کی بات ہے، امید ہے کہ کامیاب رینجرز کےجوان قومی جذبےسے اپنی خدمات انجام دینگے۔

اپنے خطاب میں شیخ رشید نے پاسنگ آؤٹ پریڈ کے شرکاکو کامیابی پر مبارکباد دی اور دوران تربیت نمایاں کارکردگی دکھانے والوں میں انعامات تقسیم کئے۔