کورونا ویکسی نیشن، پاکستان میں 50 سال سے زائد عمر والوں کی رجسٹریشن شروع کرنے کااعلان

اسلام آباد : وفاقی وزیر اسدعمر نے کورونا ویکسی نیشن کے اگلے مرحلے میں 30 مارچ سے 50 سال سے زائد عمر افراد کی رجسٹریشن شروع کرنے کا اعلان کردیا۔

وفاقی وزیر اسدعمر نے سماجی رابطے کی ویب سائٹ ٹوئٹر پر اپنے پیغام میں کہا کہ کورونا ویکسین کیلئے 50سال سے زائدعمرکے افراد کی رجسٹریشن 30مارچ سے ہوگی، 60سال اورزائد عمر کےافراد کیلئے رجسٹریشن پہلے سے جاری ہے ، رجسٹریشن کرانے والے 50سال سے زائد افراد کی حوصلہ افزائی کریں۔
یہ بھی پڑھیں: کورونا کی تیسری اور خطرناک لہر، کیا سخت لاک ڈاؤن لگنے جارہا ہے؟

خیال رہے ملک بھر میں ساٹھ سال سے زائد عمر کے شہریوں کو کورونا ویکسی نیشن لگانے کا سلسلہ جاری ہے، اس ساتھ ہی کوروناکی تیسری لہرخطرناک ہونے لگی ہے کیونکہ مثبت کیسزکی یومیہ شرح ایک سال کی دوسری بلند ترین سطح پرپہنچ گئی ہے۔

ملک میں 24 گھنٹے میں کورونا کے 4368 نئے کیسز رپورٹ ہوئے اور مزید 63 مریض انتقال کرگئے۔