وزیر اعظم نے القادر یونیورسیٹی کا افتتاح کر دیا

جہلم: وزیر اعظم عمران خان نے القادر یونی ورسٹی کا افتتاح کر دیا۔ وزیر اعظم عمران خان نے سوہاوہ میں سیرت النبی ﷺ اور صوفیائے کرام کی تعلیمات کے فروغ کے حوالے سے تعمیر کی جانے والی القادر یونی ورسٹی کا افتتاح کیا۔

وزیر اعظم نے القادر یونی ورسٹی میں شجر کاری مہم کے تحت پودا بھی لگایا، اور یونی ورسٹی کے قیام میں پیش رفت کا جائزہ لیا۔

وزیراعظم عمران خان نے تقریب سے خطاب کرتے ہوئے کہا کہ ملک میں تعلیم کی اہمیت کو اجاگر کرنا بہت ضروری ہے، کوئی بھی قوم علم کے بغیر ترقی نہیں کر سکتی۔

وزیر اعظم نے کہا جانور اور انسان میں پہچان صرف علم کے باعث ہوتی ہے، ہم القادر یونی ورسٹی کو جامعہ الازہر کی طرز پر اعلیٰ ادارہ بنانا چاہتے ہیں۔وزیر اعظم عمران خان کا کہنا تھا کہ القادر یونی ورسٹی کو نوجوانوں کے لیے رول ماڈل بنائیں گے۔