پنجاب میں ترقیاتی کاموں کے لیے خزانوں کے منہ کھول دیے گئے

لاہور: صوبہ پنجاب میں ترقیاتی کاموں کے لیے وزیر اعلیٰ پنجاب سردار عثمان بزدار نے خزانوں کے منہ کھول دیے، اربوں روپے کے فنڈز کا اعلان کردیا گیا۔

وزیر اعلیٰ پنجاب سردار عثمان بزدار نے مختلف شہروں میں نئے منصوبوں کے لیے اربوں روپے کے فنڈز کا اعلان کردیا۔ عثمان بزدار کی ہدایت پر نئے منصوبوں کے لیے اربوں کے فنڈز جاری کرنے کی منظوری بھی دے دی گئی۔

پنجاب میں رحمت اللعالمین ﷺ اسکالر شپ کا دائرہ کار کالجوں اور یونیورسٹیز تک بڑھانے کا فیصلہ کرتے ہوئے اسکالر شپ کے لیے 477 ملین روپے کے فنڈز کی منظوری دے دی گئی۔اگلے برس مذکورہ اسکالر شپ کے لیے 834 ملین روپے مختص کیے جائیں گے۔

صوبائی دارالحکومت لاہور کے 10 مقامات پر بارش کے پانی کو ذخیرہ کرنے کے لیے واٹر اسٹوریج ٹینک بنائے جائیں گے، پہلے مرحلے میں لاہور کے 3 مقامات پر واٹر ٹینک تعمیر کرنے کی اصولی منظوری دی گئی۔

مختلف شہروں میں سڑکوں کی تعمیر و مرمت کا کام ترجیحی بنیادوں پر کروانے کا فیصلہ کیا گیا ہے، وزیر اعلیٰ نے سڑکوں کی تعمیر و مرمت کے لیے 2 ارب روپے فنڈز کی منظوری دے دی۔

گورنمنٹ گرلز ڈگری کالج سمن آباد میں بی ایس بلاک کی تعمیر کے لیے 180 ملین روپے کے فنڈز، ایمرسن کالج ملتان کو اپ گریڈ کر کے یونیورسٹی کا درجہ دینے اور وہاں مختلف بلاکس کی تعمیر کے لیے 500 ملین کے فنڈز فراہم کرنے کی منظوری دے دی گئی۔

ڈویژنل پبلک اسکول ڈیرہ غازی خان کے لیے 50 ملین روپے گرانٹ ان ایڈ کی منظوری دی گئی۔علاوہ ازیں مظفر گڑھ، لیہ، راجن پور اور ڈیرہ غازی خان میں پولیس کی سب انسپکٹر، اسسٹنٹ سب انسپکٹر، ہیڈ کانسٹیبل اور کانسٹیبل کی 565 خالی آسامیوں پر بھرتی کی منظوری دی۔

بارڈر ملٹری پولیس ڈیرہ غازی خان کے 4 نئے تھانوں اور 4 نئی چیک پوسٹوں کے لیے 68 ملین روپے کے فنڈزی کی بھی منظوری دے دی گئی۔

پنجاب کے مختلف شہروں میں سیاحتی مقامات ڈویلپ کرنے کے لیے فنڈز بھی جاری کرنے کی منظوری دی گئی۔ قلعہ نندانہ میں سیاحتی سرگرمیوں کو فروغ دینے کے لیے 125 ملین روپے، کہوٹہ، کھیوڑہ اور پتریاٹہ میں 60 ملین روپے کے فنڈز کی منظوری دی گئی۔

علاوہ ازیں گوردوارہ پنجہ صاحب حسن ابدال کی ڈویلپمنٹ کے لیے فنڈز کے اجرا اور کھرڑ بزدار کے بنیادی مرکز صحت کو اپ گریڈ کر کے دیہی مرکز صحت کا درجہ دینے کی بھی منظوری دے دی گئی۔