پنجاب حکومت کا احتجاج میں شریک سرکاری ملازمین کیخلاف سخت کارروائی کا حکم

پنجاب حکومت نے ڈیوٹی سے غیرحاضر ہو کر حکومت مخالف احتجاج میں شریک ہونے والے سرکاری اہلکاروں کے خلاف سخت کارروائی کا حکم جاری کر دیا۔

ایس اینڈ جی اے ڈی نے پنجاب کے مختلف محکموں کے افسران کے نام مراسلے میں کہا ہے یہ بات علم میں آئی ہے کہ پنجاب حکومت کے کچھ ملازمیں ڈیوٹی سے غیرحاضر ہو کر حکومت مخالف احتجاج میں حصہ لے رہے ہیں جو کہ مس کنڈکٹ کے زمرے میں آتا ہے۔

یہ بھی پڑھیں پولیس نے تحریک لبیک کے سربراہ مولانا سعد رضوی کی گرفتاری التوا میں ڈال دی

مراسلے میں کہا گیا ہے کہ تمام ایڈمنسٹریٹیو سیکرٹریز جمعرات کے روز اپنے ملازمین کی حاضری یقینی بنائیں، غیر حاضر ملازمین کے خلاف سخت کارروائی کی جائے اور رپورٹ شام 4 بجے تک ایڈیشنل چیف سیکرٹری کو فراہم کی جائے۔

خیال رہے کہ تنخواہوں میں اضافے کے لیے سرکاری ملازمین کی جانب سے گزشتہ روز اسلام آباد میں احتجاج کیا گیا اور اس دوران مظاہرین اور پولیس کے درمیان شدید جھڑپیں بھی ہوئی اور کچھ ملازمین کو پولیس نے گرفتار بھی کیا تھا۔