آرمی چیف اوربل گیٹس کے درمیان ٹیلی فونک رابطہ

راولپنڈی: آرمی چیف جنرل قمر جاوید باجوہ اور مائیکرو سافٹ کے بانی بل گیٹس کے درمیان ٹیلی فونک رابطہ ہوا، جس میں بل گیٹس نے انسداد پولیو مہم کی کامیابی میں تعاون پر پاک فوج کےکردار کو سراہا ہے۔

پاک فوج کے شعبہ تعلقات عامہ آئی ایس پی آر کے ڈائریکٹر جنرل میجر جنرل بابر افتخار کی جانب سے سماجی رابطے کی ویب سائٹ ٹوئٹر پر کہا گیا ہے کہ آرمی چیف جنرل قمر جاوید باجوہ اور مائیکرو سافٹ کے بانی بل گیٹس کے درمیان ٹیلی فونک رابطہ ہوا ہے۔ ڈی جی آئی ایس پی آر کے مطابق ٹیلی فونک گفتگو میں کرونا وبا کی روک تھام اورپولیو مہم کے آغاز پر بات چیت کی گئی، بل گیٹس نے پاک فوج کی قومی مہم سپورٹ کی تعریف کی اور انسداد پولیو مہم کی کامیابی میں تعاون پر پاک فوج کے کردار کو سراہا۔

بل گیٹس سے ٹیلی فونک گفتگو میں آرمی چیف جنرل قمرجاویدباجوہ نے کہا کہ پولیو مہم کامیاب موبائل ٹیمز، قانون نافذ کرنیوالے اداروں کے باعث ممکن ہوئی ہے، پولیو مہم قومی کاز اور قومی کوشش ہے، پاکستان میں ہربچےکا محفوظ ہونا کامیابی تصور کرتےہیں۔